Ondangwa Masters ya sindana po oSocial League

0
62

Maria Namupala

ONDANGWA-Ehulilo shiwike lya piti olye eta pehulilo uudhano woliha yopankalathano mOndangwa. Oliha ndjika hayi dhanwa kaadhanitanga yomimvo dho nale oya hulile Olyomakaya ga piti.

Osipana yOndangwa Masters oyo ya sindanapo ekopi lyuudhano mboka, sho ya dhengemo konyala oosipana adhihe dha kuthile ombinga methigathano ndyoka, noya ulike uunyakwa wayo nokuya pombanda niitsa oyindji. Omudheuli gosipana ndjika Johannes Natangwe Kambonde aka Couch Muhalili okwa ti edhingoloko lyuudhano mbuka olya dhanwa oshikando shotango, sho lyali lya tameke mu Juli nuumvo, nosheeta uudhano mboka pehulilo ehulilo shiwike lya piti.

Okwa ti uudhano mbuka owali wa kwatelwa komeho nomadhiladhilo, ogali ge etwa po kosipana yomenzulonkalo mOndangwa, nolundji owa kala hawu dhanenwa pokapale kawo mpoka.

“Kashali oshipu okukutha ombinga medhingoloko ndika molwaashoka omwali oosipana hetatu dhomanyakwa, noodhaadhani mboka yeya nale mowela mokatanga kokoompadhi, oliha yetu oya kala tayi pula nawa komeho naadhani ayehe oya kala mombepo ombwaanawa noyelongelo kumwe,” Muhalili ta ti. Okwa ti osipana yawo oya kala tayi ningi shanamutango, nokwa kala ena eyinekelo maadhani ye, shoka she ya pe ompito ya dhane edhingoloko lyahugunina nospana yomanyakwa yOndangwa Legend. Molwaashoka uudhano mboka ohawu dhanwa taku talika kiitsa mbyoka osipana yi na shi ikwatelela kiitsa nokookoola, oshowo omasindano, Ondangwa Masters oye ya yotango taku landula osipana yaalongi ano Oshikoto AmaTeachers na dhilwe.

Dhimwe dhomoosipana ndhoka dha kuthile ombinga ongaashi osipana yaaniilonga moShoprite mOndangwa, KK Palace, nOluno AmaTeachers.
Okwa gwedhapo kutya shika hasho tashi kala oshikando shawo shotango taya dhana edhingoloko ndika, ashike oku uvaneke tawu kala tawu dhanwa omumvo kehe. “Etameko aluhe moshinima nenge moshinyangadhalwa kehe ohali kala edhigu, nonkene molwaashoka opo twa tameke nomakwatho oga kala taga nyangwanyangwa, moshiluku muka otwa pewa owala ekopi, noombandi, ashike moshikando tashiya otwiinekela kutya otatu kala twa mona omakwatho mpaka naampeyaka,” ta gwedhapo ngaaka.

Ta tsikileko kutya oya hala oosipana odhindji dhi kuthe ombinga omumvo twa taalela, yo ya kale taya nyanyukilwa pamwe, molwaashoka omudhani gwetanga lyokoompadhi omudhani owala kutya otashi pula shike, tati uudhano wawo olundji ohawu dhanwa momahulilo shiwike uuna aantu ya vululukwa po kiilonga mbyoka yak ala yena omukokomoko goshiwike, nokwa pandula eitulemo lyaadhani ayehe ya kutha ombinga.

Nonande we ya pehulilo numvo, okwa ti otaya ilongekidhile nokweetapo omathaneko ga nkene ye na okuhumithakomeho omuthika gomaudhano monooli yoshilongo, no taya pula aanangeshefa ye ya yambidhidhe nokuya monena omakwatho, opo ya kale taya gandja omasindano omanene kaasindani monakuyiwa, yo ya tsikile nuudhiginini ngaashi shi li shimwe shomiilalakanenwa yawo.
Okwa ti oya dhiladhila monakuyiwa ya kale nomaudhano galwe ngaashi ovolleyball netanga lyomokambamba lyaakadhona.

LEAVE A REPLY

Please enter your comment!
Please enter your name here