Ondjila ya Onesto naMiss Rose moongalo

0
12

Pinehas Nakaziko

WINDHOEK-Aahikingalo mboka haya imbi oongalo dhomaludhi ga yoolokathana, Onesto naMiss Rose osho ya uvathana ya imbe pamwe, moalbuma yaOnesto ndjoka opo ya piti paife yedhina ‘Ondalila.’

Aahikingalo mbaka yaali oya imbi uungalo wuthike puuheyali, mboka wuli moalbuma Ondalila, mwakwatelwa Hikongo Ombongo, Ombili, Baby Wange, Let You Go naBoo, mboka tawu hokitha.

Onesto, ngu edhina lye oye Onesmus Mwafangeyo, okwa ti okwali a hogolola oku imba na Miss Rose, edhina lye Rosalia Shikulo, moalbuma ye ndjika opo atowaleke oongalo dhe, newi lye lyoshingoli. “Miss Rose okuli oye ena uunongo moku imba, nokuli ha towaleke kehe ongalo ndyoka ta imbi mo,” Onesto tati ngaaka.

Okwa gwedhapo tati okwali tango apulakene kongalo yaMiss Rose yedhina I Miss You, ndyoka ali eyihokwa, nokwali ewete Miss Rose a opalela omaimbilo ge ngoka ali ahala oku imba.

“Kakwali naana oshidhigu oku imba na Miss Rose, naashika oshali oku ilonga sha moongalo, oshoka Miss Rose oye ali ahokithandje oku imba, noku pandje omukumo opo ndiholokepo noalbuma ndjika, konima sho twa imbi uungalo uushona pamwe,” Onesto tati ngaaka.
Oalbuma ya Onesto oyili tayi popi kombinga yondjila ndjoka a enda onga omuhikingalo. Onesto okwali atameke oku imba okuza mo2005 nakuume ke kopothingo kohi yedhina Onesto&Eddy.

“Okwali tuna ondjodhi yafaathana, noka twali twa hala oku longela nando omuntu, notwali twa hala tukale aahikingalo aanene mehangano ndika lyoongalo, ashike iinima inayi ka enda nawa,” Onesto ta popi ngaaka, etagwedha po tati oyali ya imbi ongalo ndjoka yali ya hokiwa koyendji, Ghetto Luv mo2011, ashike kapwali puna ngoka teya kwathele pashimaliwa.
Onesto okwati natango otaka pititha ishewe ooalbuma dhe mbali komasiku gokomeho.

Onesto okua imba nale naahikingalo aanene ngaashi Tequila, Kavax, Sally Boss Madam naDice, nongashingeyi okwa ti okwa hala aka longe naGazza, Mapz, Young T, The Dogg, Daphney, Tesh, Tate Buti naahikingalo oyendji aashona.
Moonkundathana noshifo Kundana, Miss Rose okwa ti euvathano lyawo olyali lya holoka sho a li a pititha okangalo ke (I Miss You) komapandja gaali goongalo go ko intaneta, Namibian Music noSound Cloud.

Onesto naMiss Rose oya kwatitha tango ongalo yawo yedhina Let You Go, kuyele nuumvo.
Miss Rose okwa za ena ohokwe yoku imba manga ali omushona lela, sho a kala noku imba mosikola yosoondaha, piituthi yomavalo osho piigongi yomazimo.

Omvula ya zi ko, Miss Rose omo ali apititha okangalo ye ndjoka I Miss You.
“Okuza mpoka okwali nda mono kutya inandi lesha naana ehangano lyoongalo nawa, no nda kambadhala opo ndi tale nkene ndi na okutula oongalo dhandje omulyo,” Miss Rose ta ti ngaaka.

Okwa gwedha po ta ti mpoka opo a zi a tule uukuni kumwe naOnesto, opo ya kambadhale oku imba oongalo oombwaanawa.
Omaimbilo ga Miss Rose oongoka taga popi kombinga yohole, no ge na omulyo gwoongalo ngaashi RnB, Afro-po no Soul. Oalbuma ye okwa tengenekwa yika pite omvula ta yi ya, notayi ka kala yi na omaimbilo 14.

Okangalo ke okatiyali otaka ka pita omwedhi ta gu ya. Kedhina Bring Back My Heart. Mongashingeyi Miss Rose ina shainwa nando okehangano lyasha.

Oomvula mbali twa taalela, Miss Rose okwa ti ota ka kala omuhikingalo omunene, ngoka omaimbilo ge ta ga ka kala taga dhanwa konyala moshilongo ashihe. Okwa ti ye okwa hala oku kala na Papa Shikongeni oshoka oha imbi nawa.

LEAVE A REPLY

Please enter your comment!
Please enter your name here