Robert Mugabe: Okudja koupendafule

0
74

Robert Mugabe waZimbabwe osho a fii po oshipundi shoupresidende mEtivali konima yoshivike eshi omatanga opakwaita moshilongo shaye a tokola opo e mu fininike a xulife po oupangeli, konima yeedula hanga 40, eshi Mugabe oo a li a talika ko onga ependafula, a shituka ndele ta ningi omuleli a kukutila koshipundi.

Nonande a kala oule woshivike ashishe ta anye okudja ko koshipundi pefimbo a kalelwa kovakwaita, ndele na fiyo ta taawa kongudu yaye mwene oyo a tota po yoZANU-PF, omunamido 93 osho ngoo a ka tonyala. Ashike eshi okwe shi ninga eshi a mona omutumba wopashiwana wa tameka, efimbo olo oilyo yomutumba ou yali ya tokola ngeno i patululile Mugabe oshibofa, nokumukufa ko koshipundi tava pitile momhangulilo.

Ashike Mugabe eshi, okwa mona kutya otashi dulika shika etelele oinima ihapu, onghene mokuhena nghee, okwe li kufa ye mwene koshipundi, pefimbo ashike eshi omutumba opo tau hovele. Eshi Omupopi meumbo lopashiwana Jacob Mudenda a shivifa kutya Mugabe okwa tokola opo a fika me ko koshipundi shoupresidende nokushi fiya po, no inashi pumbiwa vali a kufilwe onghatu yopaveta eenghuwilili neenghalulu ina di udika mo nale moparliamente yaZimbabwe oda udika moule.
Mugabe ependafule

Mugabe okwa tali ka ko onga ependafuledingi muAfrica omolwa onghandangala oyo a dana mekondjelomanguluko oilongo yAfrica meedula 1980.

Omuleli ou a kala omuhonhu nomunandunge okwa kala a fimanekwa molwaashi okwa kala a ninga omaudaneko oku kufa ko edu lovaAfrica koilumbu nokulishunifa koovene.

Vahapu ova kala va tumbaleka Mugabe molwa sho a kala a fikama oilumbu noilongo yokouninginino oyo a kala eudite kutya kai na oufemba okuli dopa mo moipambele yaAfrica. Okwa kala ependafule mokuudifa ko ovaAfrica nokwa kala eli omhinge netapemo louyamba waAfrica ngaashi oikwamina oyo hai tapa mo muAfrica ina i longululwa, nohai ka longululwa kondje yenenedu oko hai ka tulwa ongushu, yo ilandi fwe po koimaliwa ihapu. Momudo wo2015, oshinyanyangiwa shedina Zimbabwe Financial Gazette osha lopota kutya Zimbabwe oye oshilongo osho shina ovanhu vahapu muAfrica vahongwa, omo nokuli eepelesenda 90 dovakulunhu dishi okulesha nokushanga.

Mugabe omulongwanhu
Meputuko laye onga okamatyona, Mugabe okwa kala a tula efimbo laye momambo na okwa hongwa keefikola ngaashi Marist Brothers and Jesuit schools, Kutama College ili moZvimba District, oyo nale yali hai ifanwa Salisbury. Tete okwa pita ndele ta ningi omuhongi ashike okwa fiya po oshilongo noku ya ko Southern Rhodesia oko a kala tadi manga ta shiti ofikola koUniversity of Fort Hare oyo ili poshishiindalongo South Africa, oko oko a mona onghatu yaye yotete yodegree modula yo 1951, yomeenghatu heyali doulongelwe odo ena.
Okwa longa ofikola moNorthern Rhodesia (paife hai ufanwa Zambia) fiyo omodula yo1960. Efimbo ali modolongo mo1964, Mugabe natango okwa kufa omambo aye teli longo nokumona ongatu yodegree moikwaveta. Konima okwe ke li longela onghatu yoBachelor of Administration and Bachelor of Education ei li longela koUniversity of South Africa (UNISA) okwe li longela vali onghatu yoBachelor of Science (ounongononi), oBachelor of Law, Master of Science noMaster of Law koUniversity of London.

Okwa li yoo a pewa eedegree 13 odo ihadi pelwa omunhu omambo, hano hadi pewa ovanhu ovo va longa nawa moimhungu yonhumba. Ashike nhatu domeedjapo odo, okwe di kufululwa. Modula 2007, Edinburgh University oye mu kufa odjapo oyo ve mu pele mo1984 molwa ekufombinga laye momadipao ovanhu 20,000 moMatabeleland . Natango mooula yo2008, oUniversity of Massachusetts ovemu kufa odegree yaye noMichigan State ove mu nyekululile ohonorary degree yaye yoikwaveta modula yo1990. Mugabe Ependafule lopapolitika Mugabe opolitika okwe i joina modula yo 1960, eshi a alukila ko Southern Rhodesia, nokwa ninga oshilyo shongudu yo National Democratic Party (NDP). Ye pamwe navakwao vamwe velili, ova tota po po ongudu yo Zimbabwe African People’s Union (ZAPU) oyo yali tai wilikwa kuJoshua Nkomo. Okwa ka ninga nee oshilyo shehangano lali hali ifanwa Zimbabwe African National Union (ZANU) lali mewiliko laNdabaningi Sithole. Mongudu omo Mugabe okwa hoololwa ndele ta ningi hamushanga ndjai (Secretary-General). Konima eengudu dopapolitika adishe oda taata wa mo moZimbabwe mo1964 kuPrime Minista pefimbo opo Jan Smit sha landula omalweedi nepangelo. Ovaleli veengudu odo mbali mwa kwatelwa Mugabe ova idililwa modolongo molwaashi va lwifa epangelo. Ashike manga ali natango modolongo, Mugabe okwali a hoololwa onga omuleli waZANU mo1974. Konima eshi a dja mo modolongo, Mugabe okwa faduka po nokukakala koMozambique oko a kala ta lele nawa eengudu mbali do Marxist noMaoist ZANU modula yo1975.

Eenghundafana pokati ka Mugabe naNkomo dodula yo1979 oda twala fiyo omeudafano ledina Lancaster House Agreement, olo la twala fiyo omedalululo loshilongo osho eshi sha ninga Zimbabwe.

Omahoololo eshi a ka ningwa modula yo 1980, ZANU oya findana po omahoololo, na Mugabe okwa ninga Prime Minister wotete woshilongo modula 1980.

Oshipundi shouPrima osha ka lundululwa ndele tashi ningi shomupresidende modula 1987, naMugabe okwa kala presidende woZanu-PF, fiyo okomatango etivali loshivike eshi.

LEAVE A REPLY

Please enter your comment!
Please enter your name here