Zimbabwe oshileshwa shiwa kuAfrica

0
36

Africa olo enenedu la tali ka ko kounyuni onga enenedu londjala, oluhepo, oukolokoshi netiko lohonde.
Ashike oshishiindalongo shaNamibia Zimbabwe osha ulikila ounyuni kutya shaashi moilongo imwe ngaashi oDemocratic Republic of Congo (DRC), Kenya, naikwao ihapu omuholike ounamapove, itashi ti Africa alishe ola itavela metiko lohonde onga omukalo wekandule po lomukundu.

Oshivike eshi, Africa, nounyuni aushe koonono ova li va teelela okuuda omahokololo mai taadilile moZimbabwe, pamwe nande ovakwaita valwa, ile ovayambididid vaRobert Mugabe novayambididi vaavo va amuka ko kuMungabe veli puma mumwe.

Ngeno okwali omoilongo imwe muAfrica ngeno omitopelo deendjebo oda udika, nomapandaanda ngeno omalaula fokofoko, ngeno omataiyeka a xwikilwa meestalata. Nokuli nomatungo amwe ngaashi eeuniversity ngeno oda mbonyaunwa, daxwikwa, nomakende a tataulwa. Ashike fiyo opapa, kape nande olopota youkolokoshi nouxwapindi wa dililila moZimbabwe.

Eshi otashi ulike kutya, ova Africa navo ova putuka, notava dulu okukandula po omikundu davo pamukalo weputuko, ina u nyika nande oikolokosha.

Ngee owa tale poshishiindalongo South Africa, oinima imwe –hano omaudonai avo mwa kwatelwa omahololo omadilaadilo luhapu, ohaa xulile metiko lohonde, mekanifo leemwenyo, nomenyonauno lomaliko. Efimbo nee limwe omahololo omadilaadilo aa ihaa eta nefikilo liwa ile oshidjemo osho sha halika. Ponhele yokutala komakemo, oshinima ashishe oha shi piluka vali nokutala kouxwapindi wa ningwa pehololo lomadilaadilo, naasho shali sha kufa ovanhu momutumba tashi dimbiwa manga.

Eemhata nokuhenambili kwOvaAfrica ohaku ulikwa nouhasha, nonomalihumbato kwafa kuhena vali mongula.
Ashike vamwameme vaZimbabwe ovali va loloka, va kala nokupangelwa komunhu umwe eedula adishe 37 neemwedi heyali, eliko lavo ola ya pedu neenghono, oshilongo shihe na oilonga, efimbo limwe nande nee kala una okamaliwa wa hala okulanda oikulya, noinima meefitola kai mo. OvaZimbabwe vahapu ova fiya po shilongo shavo ndele tava i moupongekwa womahupilo moilongo ikwao yaAfrica nomounyuni aushe.
Atushe otwa kala tu wete nghene ovakwashiwana vaZimbabwe tava ningwa nai. Nokuli ngaashi moSouth Africa vahapu ova kanifila mo neemwenyo, va longelwa ominyonena molwaashi vati ovadjai djai.

Ashike luhapu inava kala vena nghene vena okuninga, ova kala ashike tava yepa efyo vafa tava yepa okatanga. Naashi nee vaka fikama inava longifa nande ouxwapindi, ova longifa eenghono dopamadilaadilo, tadi ulike eputuko neendunge.
Hano ava ova holola naanaa kutya eshi haku tiwa Zimbabwe osho oshilongo shina ovahongwanhu vahapu muAfrica, oshoshili. Kapena nande omalimbililo kutya, oshilongo shi na ovanhu vena eendunge doudalelwa mo nehongo lawana, otashi dulu okulwifa omashongo noku a finda mombili nomelandulafano, nefimaneko yoo.

Nonande va findana ngaho nokukufa oo a li nale omupresidende wavo koshipundi, itashi ti ovaZimbabwe ova hanga efikilo.
Natango oshilongo osho onghee tuu shina okulonga noudiinini opo shi tungulule eliko lasho, shi ongele ovakwashiwana ovo va halakana nounyuni.

Ovo tava kala melelo laZimbabwe natango ove na oshinakuwanifwa okutungulula omakwatafano oshilongo osho noilongo ikwao mounyuni, oo a hangika ehe po vali nawa shaashi okwa hangi ka eheli vali nawa pefimbo lepangelo laMugabe.
Shikwao, natango epangelo olo ola pumbwa okutwikila oku longa noudiinini nokufya oshisho kutya ombili oyo va tameka nayo pelundululo eli, oya twikila.

LEAVE A REPLY

Please enter your comment!
Please enter your name here