MoNamibia omuli ngiini ano?

0
64

Komutoolinkundana

WINDHOEK-Omishangwa nomakonaakono ga ningwa oomwedhi ndhika oga holola omaukwatya ogendji moNamibia, gamwe ngoka ga limbilika nagamwe taga tilitha omanga gamwe taga kumike omuntu nenge aantu ya longe noonkondo.

Osha ulikwa kutya eendelelo moku dhika omagumbo giipeleki miilando olya yi pombanda notali tilitha , shika sha ningwa pokati komimvo 2011 sigo 2016. Eindjipalo ndika olye ya molwashoka oshigwana nasho osha indjipala sho ngashingeyi Namibia e na aantu oomiliona 2,3. Eindjipalo ndika lyoshigwana otali ti aagundjuka unene tuu mboka ye li pomimvo 25 nomi 34 otaya thigi po omikunda momiyalu ominene nokuya kiilando okuka konga uuhupilo wuli nawa.

Pahokololo lya shangwa miizemo yomayalulo gopokati komayalulo gopashigwana ngoka ga ningilwe omumvo 2016 haga takumwa ‘2016 Namibia Intercensal Demographic Survey Report, ga ningwa kEhangano lyomiyalu lyopashigwana, “oondoolopa odha indjipala moNamibia, naashika osho tashi ningitha aagundjuka ya thige po omikunda taa tondokele koondoolopa.” Ngashingeyi momikunda omuna owala aakulupe naanona yosikola. Eindjipalo momwaalu goshigwana otali ti wo oshilongo oshina okulongitha oshindji okukala pethimbo mokufuta openzela yaakokele, okufuta iimaliwa yoshipangelo nokufutila elongo lyoshali osho omutalinawa gumwe a popi. Namibia oye oshilongo shimwe shomiilongo iishona muAfrika hashi futile omuntu kehe ngoka ha talele po oshipangelo ooN$494 mukehe gumwe miipangelo yepangelo.

Nonando omuntu ohafutu sha iimaliwa oyindji ohayi gwedhwa ko kepangelo. Ehangano lyUundjolowele kohi yIigwana Hangano [UN] WHO] olya utha kutya oshilongo kehe nashi longithe oo N$494 momuntu kehe ta talele po oshipangelo nenge okapangelo. Namibia otaku hokololwa ha longitha konyala ooN$500 momuntu kehe a talele po oshipangelo shepangelo. Iilongo oyindji yAfrika ohayi longitha konyala oshimaliwa shi li pokati koo N$169 nooN$273 momuntu.

Ekonakono ekwawo lya yooloka kwa andika oondyoka lya ningwa kOmbelewa yOmbudsman lya ulike kutya nando opena omulandu gwedhiminathane po uukwamuhoko nuukwaludhi otau pangele natango moNamibia lyonena. Pethimbo ndika natango aantu oohandimwe ohaya iyulike tango kutya ye omukwashike komuhoko nenge kolwaala. Omolwashika ombelewa yOmbudsman oya ngongopo omushangwa gu na omathaneko ngoka epangelo lya pumbwa okuga tula miilonga okupalamena onkalo ndjika yuukwamuhoko, uukwaludhi oshowo omikalo kehe ndhoka dha tothwamo dha nika oshiponga kuNamibia.

“Otwa ulike kutya osha pumbiwa meendelelo okukutha po elaka lyuukwamuhoko nokuhalakanitha po uukwatya wuukwaludhi moku eta po omalunduluko taga endelele noga dhenga pombanda. Otwa pumbwa oku eta po elaka tali hokitha opo tu kondjithe ndyoka lyuukwamuhoko,” Ombudsman gwa Namibia Omutseyimpango John Walter a ti. Walter okwa gandja omushangwahokololo gwe naashoka a mono oshowo omathaneko ngoka a gandja kombinga yoshinima shuukwamuhoko nuukwaludhi , nuukwazimo mboka wi igalala moNamibia nena konima yomimvo 27 dhemanguluko. “Edhina otali shi ulike: ‘Oshigwana sha topoka: Omolwashike uukwamuhoko nomikalo dhilwe dhokatongo natango dhi na omwenyo moNamibia konima yomimvo 27 dhemanguluko” Ondi itaala kutya shika oshinima oshiwinayi kutya tse oshigwana sha topoka,” Walter a ti.

“Meni lyoomwedhi hamano konima yoku taamba ehokololo ndika onda hala okumona oonkatu tadhi ka kuthwa nkene omathaneko geli mugo taga ka tulwa miilonga,” Walter a indile.

Iizemo yomushangwahokololo oya ulike kutya kapena oonkatu tadhi kwatha lela kwaamboka ya ningi iihakanwa yuukwamuhoko, okatongo kuukwamuhoko nenge okutongolwa kwaalukehe. Omushangwa ogwa thaneke pu ningwe omahala gokupulakena aayonenwa yopaukwamuhoko, mpoka mbaka taya vulu okuhokolola omahokololo gawo “opo okwaathike pamwe, uukwamuhoko, okatongo kuukwamuhoko ka vule okuhulithwa po. Oshoka shika Walter okwa ti ooveta dhokukondjitha okatongo odha ndopa oku eta po elundululko monkalathano sho ndhika dhafa tadhi kutha mboka ya ehamekwa oonkondo oku popilwa.”

Oshikwawo omiyalu odha ulike kutya shimwe oshiwanawa momushangwa nguka oshika kutya opena ehwepopalo momagumbo ngoka ge na omeya omawanawa nokunwa. “Omagumbo gena omeya omayelele oga ningi ogendji nooperesenda 14 oku za poopelesenda 80 mo 2011 okuthikama poopelesenda 94 momumvo 2016,” omushangwa osho gwa ulike. “Ihe nando ongaaka oshindji osha pumbwa okuningwa kombinga yeyogopalo molwashoka ndika ina li adha natango oopelesenda 46 dhaanamagumbo moNamibia mboka ya ti ohaya longitha iihwa, omasilu gomilonga nomapya oku kiiwatela ngele sha pumbiwa.,”olopota ya ti.

Omiyalu odha ulike wo kutya oshitopolwa sha Khomas osho shina eindjipalo lyaantu oyendji , nomwaalu gwoshigwana moshitopolwa shoka ogwa thikama paantu 415 780, omolwa omatembu gaagundjuka okuza komikunda, shika osha landulwa koshitopolwa shaHangwena shoka shi na aantu konyala 255 510 nOmusati gu na aantu 249 885. Khomas okwa ulike ekoko moshigwana she lyooperesenda 3,9 a landulwa koshitopolwa Erongo nooperesenda 3,8.

LEAVE A REPLY

Please enter your comment!
Please enter your name here