Omusindani Geingob a indile uukumwe konima yokongresa

0
45

Selma Ikela

Windhoek-Omupresidente omupe goSwapo, Omundohotola Hage Geingob, okwa uvaneke ta ka yakula nokulongela aaNamibia ayehe nokuhanganitha iilyo ayihe yongundu tayi pangele konima yiikonga yokuhogololelwa piipundi mongundu ndjoka pokongressa ontihamano ndjoka ya li ko omwedhi gwayi moVenduka. Petameko lyokongress ndjika aapresidente aakulu Sam Nujoma na Hifikepunye Pohamba oya ulike omaipulo gawo komikalo ndhoka aathigathani moongundu mbali ya li ya ningi iikonga yokuhogololwa unene sho ya longitha omalaka inaaga dhiladhilwa nawa go gamwe oga honga nomakwawo oga li taga gandja oombedhi nomausama.

Geingob okwa thigulula ongundu ya fa ya topaguka, yo otayi piyaganekwa natango komatopoko ngoka ga zile mokongressa yomomumvo 2012. Mokongressa ndjoka omo moka omupresidente Geingob a li a hogololwa Omupevipresidente gwongundu. Okwa kala omuwiliki gwoSWAPO ongo omupresidente ta kwathele konima sho Omupresidente Hifikepunye Pohamba a thigi po iilonga mbyoka ongo omupresidente gwongundu.
Opethimbo lyuuwiliki waGeingob ongomupresidente ta kwathele sho aawiliki yane yaagundjuka ya li ya tidhwa mo mongundu, omanga Ohofa yOpombanda inaa yi gandja elombwelo opo mbaka ya shunwe mo.

Geingob mokutaambako Uupresidente wongundu yoSWAPO okwa popi mombepo yedhiminathano po naakondjithi ye, a ti kapuna mboka ya sindika pokongress molwashoka ongundu yoSWAPO oyo ya sindana molwuudemokoli wayo wakola nomolwa omaukwatya gayo gayoolokathana.

Geingob, ngoka a li methigathano na Jerry Ekandjo oshowo Nahas Angula molwoshipundi shuupresidente wongundu oye a sindana po oshipundi shoka. Molwesindano ndika, Geingob oye ta ka thikama ongokandidate yoSWAPO momahogololo gopashigwana noguupresidente omumvo 2019. Omupevi Prima Minista nOminista yIipambele yOpaigwana nElongelokumwe, Netumbo Nandi-Ndaitwah, okwa sindana uupevipresidente woSWAPO methigathano naMinista yIikwagumbo, Pendukeni Iivula-Ithana nOmuwiliki gwoKommissi yomathaneko gopashigwana nale Helmut Angula. Minista Yeyokomeho miilando nokomikunda Sophia Shaningwa oye Amushanga Ndjayi omupe konima yoku sindana ethigathano ndyoka ya li mo nomugundjuka Armas Amukwiyu. Ye Shaningwa ota kwathelwa komupevi Amushangandjayi, ekuya lya kala nale mongundu Marco Hausiku,ngoka a thigi po aathigathani na ye , Petrina Haingura nomunedhina mongeshefa Martha Namundjebo-Tilahun. Sho Shaningwa ta ka kuutumba miilonga yuu-amushanga ndjayi ethimbo alihe, Omupresidente Geingob okwa tegelelwa a ka ulike ominista ompe ndjoka tayi kutha po oshinakugwanithw shewiliko ndyoka Shaningwa ta thigi po.

Opwa tegelelwa kutya Omupresidente otaka ninga elunduluko enene moKabinete ke, nonando omupopyo gwe guudha edhiminathanepo ogwa ulike tashi vulika itaa ka inyengitha mboka ya li taya thigathana po naye pamwe naahogololwa ye. Iikonga omolwomahogololo muuwiliki woSwapo oya longitha omalaka inaaga opala, omwa konekiwa wo kutya omwa li omatukathano nokuponokelathana peha lyokupalamena omashongo ngoka ga taalela aawilikwa moshilongo, okuza koombinga mbali ndhoka dhi iluka Etanga Harambee nEtanga Swapo. “Osho hashi kala kutya mboka ya li methigathano ndele inaya adha esindano ohashi vulika ya kale yu uvite nayi.Shika oshitopolwa shonkalathano oshoka etanga kehe li li methigathano lya hugunina ohali dhana neinekelo lyokusindana. Shika osho elalakano lyandje konima yokongres okuhanganitha ongundu’ Geingob a ti.

Geingob okwa ti kashi shi okutumbula ngoka a sindana nenge a sindika molwashoka kapena aasindiki moSWAPO oshoka kapena omuntu e vule ongundu. “Nena itatu popi kutya nguka okwa sindana nenge nguka okwa kana nenge etanga ndika olya kana methigathano. Kapena ngo a kana moSwapo. Nena , Swapo okwa sindana. Kutya opena omaupyakadhi ge thike peni, Swapo ota kala aluhe omusindani. Moshipopiwa she Geingob okwa ndjandjukununa ondjila ya nkene ta ka gwanitha po omauvaneko gomomanifesto yo 2014 yoSwapo, sho ta ka kondjitha ondjala, oluhepo, okwaathike pamwe miiyemo nokudhengela ondhi peho. Okwa gana kutya ota ka hwepopeka elongo, uundjolowele, eopaleko lyevi miilando, omagumbo neyogopeko.

Omupresidente okwa thaneka wo oku landula eyokomeho pamahupilo, pangeshefa, okueta po oompito dhiilonga, noku tunga po iiyalo, mokati kiilongadhalwa oyindji.

“Okufutila eyokomeho ndika, opena okumonika omikalo omipe dhoku shi ninga , okuyeleka nokuhehela omikuli ndhoka dhina ondilo, naashika otashi kala oshinakugwanithwa shotango.

Okutameka nepangelo lyopokati, oli na iinima mbyoka ihaa yi eta mo sha mbyoka tayi vulu okulongithwa okufutila eyokomeho moshilongo” osho a popi kombinga yondjila ndjoka yi na okulandulwa okupendula po omahupilo noongeshefa.

Geingob okwa ti ye okwi ilongekidha mokukundathana nongundumutima nopolitburo okunkondopeka ewiliko lyongundu moku ulika omuwiliki gwethimbo alihe e li pomuthika gwa amushanga takalele nokufutwa kwe okuli pomuthika ngoka oshowo iilonga ye.

Omupresidente okwi ilongekidha wo okukundathana omathaneko kutya amushanga ndjayi a pewe aayakuli yaali okumu kwatha okuhwepopeka ewiliko lyombelewa. Opena wo omathaneko oku opaleka ombelewa yongundu opo yi ete po omahala goombelewa dhaapresidente yaali yotango. Mokati komathaneko omuna wo ndyoka lyokufuta iilyo yOndilimani oondjambi dhili nawa noku ya pa wo omagumbo.
Opena wo omathaneko oku tula po ekwatho lyuunamiti lyaaniilonga pombelewa yoSWAPO oshowo lyaakwiita yoSwapo.
Okwa thanekwa wo kutya pu kale hapa ningwa omayalulo geli nawa gomahangano gongundu.

LEAVE A REPLY

Please enter your comment!
Please enter your name here