Oompangela dhawo dha yiwa moshipala kopolisi

0
695

Maria Namupala

ONDANGWA-Omolwa oshikumungu shomananathano nomahilathano shoka sha kala tashi lopotwa mOndonga, ongundu ya yamwe yomaakalimo mOndonga oyali ya ngundumana poombelewa dhelelo lyoshilongo shAndonga Omaandaha oshiwike shika.
Ongundu ndjoka oya kala ya thikama komeho gombelewa ya tegelela okuya meni ashike inaya pewa epitikilo ya vule okupita omweelo gombelewa. Ongundu ndjika oya li ya thikama po maakwashigwana, yamwe yomooyene yomikunda, na gamwe gomomalenga ngoka ga kuthwa miilonga nuumvo.

Moonkundathana ndhoka twa ningi nomupopiliko gongundu ndjika Pendapala Nakathingo, okwa yelitha kutya oyali yuunganeke engundumano ndika, nelalakano lyokuya mombelewa nokukutha mo amushanga ngoka a tulwa po, oshowo okupata omakumba gombelewa oyo tuu ndjoka.
Nakathingo okwa holola kutya natango onkene oshitunda shOndonga shi li mevundakano, noshikumungu shika osha pumbwa okwe etwa poshitaafula shi ikundwe sho shi hulithwe po, yo Ondonga tayi tsikile nombili ngaashi sha kala nale.

“Otwa koneke kutya oomwedhi dha ziko omwali mwa kuthwa omalenga gaheyali miilonga shaali pauyuuki, nomalenga ngoka ga pingene po ngoka ga tidhwa, kageli paveta no taga longo iilonga inaashi uthwa, onga omupopiliko otwali tweya mpano ashike inatu pewa epitikilo lyokuyamo mombelewa molwa omatompelo twaa gashi,” Nakathingo ta yelitha ngaaka.

Mu Apiilili nuumvo Omukwaniilwa okwa kutha miilonga omalenga goo Vilho Kamanya, ngoka ali amushanga gwelelo Joseph Asino, Kashona Ka
Malulu, John Walenga na gamwe. Okwa ulike woo omalenga gamwe ngoka ga pingenepo mboka ya tidhwa ngaashi Nepando Ampanda ngoka oye eli amushanga gwElelo lyOndonga ngashingeyi, Jerry Kambala, Reinhold Nepolo, naanangeshefa Paavo Amwele na Erastus Mvula.

Konima yetidho ndika yamwe yomoshigwana shOndonga oya kala taya gongala poompito dha yooloka, nokwiikunda nkene ye na okukandula po omukundu ngoka, molwaashoka oye wete kutya Omukwaniilwa ha ye ta tidha aantu, noku kala yeli ompinge netidho ndyoka.
Konima yoowili mbali dhengundumano lyawo kondje yolugumbo lwombelewa, omalenga ngoka haga longo mombelewa ogali ga tokola okupata omweelo, molwaashoka anuwa oyali yena uumbanda ka ye shi kutya omalalakano gawo oga shike.

Ongundu oyali ya ngundumana ando yi popye shoka ye endela mono lwanima Nakathingo a ka tameka ando a hala a yelithe ashike opolisi yoshilongo oye ya yi moshipala, komatompelo kutya anuwa inaya ninga eindilo ye ye ya talelepo ombelewa, nonkene oyali ya pewa ominute 20 ya kale ya thigapo ombelewa nongele hasho opolisi oya ti otayi key a tidha po.

Nonande yali yafa inaaya hala okuzapo ongundu ndjoka oya zi po tayi ngungutula, nokuthiga po ehala olyo tuu ndyoka.
Nakathingo okwa holola kutya nonande oompangela dhawo dha yiwa moshipala itaya hulile mpoka, yo itaya shuna monima, otaya tsikile nokukondjela uuthemba waaNdonga, yo ya kalekepo Ondonga ngaashi ye yi adha po.

LEAVE A REPLY

Please enter your comment!
Please enter your name here