Oupononwa 54 va nangekwa moshipangelo shaShakati

0
554
dav

Omutoolinghundana

OSHAKATI-Mokudimbuluka efiku loupononwa ohani ya djako oupononwa 54 ovanangekwa moshipangelo shaShakati moshitukulwa shaShana. Ouyelele owa yandjwa kOndokotola yoshitukulwa shouhaku wounona moshipangelo shaShakati, Antindi. Odula keshe moshipangelo shaShakati ohamu nangekwa ouhanana ve dule 2 000, kwa talika kutya omwedi keshe ohamu dalwa eehanana 120 lwaapo, eepelesenta 40 dounona hava fi mokati kavo oupononwa. Noveba 17, efiku leli kalekelwa kEhangano lOundjolowele mOunyuni [WHO] kutuwe omufindo komikalo keshe tadi dulika kuningwa okuxupifa oupononwa nokukelela omadimo aha dalwe inaa fika poivike 37. Oshikando shotete oshipangelo sha shiva ovayandji voumbangihokololo mefiloshisho loupononwa.

Ovayandji voumbangihokololo va li poshivilo, ova holola nghee shidjuu kweeta okaana inaka kola omolwa ondilo younamiti noinakuwanifwa ya wedwa po ka dule okutupuka. Omuhakuli keifano moshipangelo shaShakati Karoline Shiyagaya, okwa hokolola eshi e li velipa meehani heyali a eta ohanana yokakadon inai wanifa eefunda nokulekelwa moshipangelo konima yomafiku avali, omanga ohanana ei fiya mefiloshisho loshipangelo. Shiyagaya ta fatulula oudjuu wokumona okaana kotete komudali ina shiiva nghee e na kukala nako, okutala keefunda, kenyamifao lwoikando ihapu nonghee moshipangelo muhena efimbo lokutulumukwa ngaashi keumbo nokutala yoo komhumbwe yoikulya yomunyamifi.

Shiyagaya a eta ohanana yaye yokilograma 1,7 okwe i fila oshisho okudja petameko eshi, oshihopanenwa shiwa kovadali voupononwa, nande e na oinakuwanifwa ya li ihapu moilonga okwa tekula noshisho nokaana oke li nawa ngaashi ounona vakwao keli mondodo onhinhano.
Evelyn Uahengo omuungaungi wonghalonawa naye omunashilonga moshikondo shoundjolowele, naye a mona okaana kotete meehani heyali okakadona ke na eefunda 1,9 okwa deng’omufindo kenyamifo oikando ihapu, okuluufa komikalo douhaku, oudjuu kukala momudingonoko u li li nokaana ke li monghalo oyo.

Pefimbo va eta ounona vavo epangelo pamwe nEhangano lOundjolowele mOunyuni kavali va eta po omukalo wokumangela ohanana ponhulo ya ina a nangala ongali ngaashi wa tulwa moilonga paife. Oshikondo shouhaku osha mona kutya omukalo tau popilwa tau ifanwa Kangaroe Mother Care ouwa neenghono .

Ina ota pashukile okaana efimbo keshe, ota pupu omufudo noupyu wako, oke udite ohole neameno efimbo keshe. Onghee omundokotola Antindi okwa kumika oshiwana shi tandavelife etumwalaka lokudiinina oundjolowele tu henuke oludalo leehanana inadi wanifa oivike 37 meteelelo.

LEAVE A REPLY

Please enter your comment!
Please enter your name here