Young Chiefs a tsikile niizemo iinkundi muudhano we apehe

0
25

Shipi Elago

OSHAKATI-Onakuyiwa yosipana yoYoung Chiefs moPremier League oyi li moshiponga konima sho osipana ndjika oyo ayike ya kalelapo iitopolwa yokoNooli yoshilongo ta yi tsikile noku gandja iizemo ya nkundipala nkene tuu oliha ya tamekele.
Young Chiefs ngoka inaa lola natango esindano okwa hunutha ompito yokusindana ehuliloshiwike lya zi ko sho a ndopa oku dhenga Life Fighters nOrlando Pirates ndhoka dha li dhe ya oku mu talela po pokapale kEmanguluko mOshakati.

Molyomakaya Young Chiefs okwa li a tula Life Fighters okoola moominute dhopetameko dhe dhingoloko lyotango noku pa aayambidhidhi einekelo kutya omasiku go ku sindana ge oga galuka.

Eyalulo olya li yimwe monola sho oosipana ndhika dha yi pokafudho ashike, Life Fighters okwa li a dhenge aayambidhidhi yaAmathekie pomutima sho a li a tulamo okoola yoshiyakela. Eyalulo lya hugunina Young Chiefs 1-2 Life Fighters.
Mosoodaha Young Chiefs okwa li a yi molugodhi nOrlando Pirates yimwe yomoosipana oonankondo mondjokonona yoPremier League, moka oyendji oya li ya tegelela Young Chiefs opo a ninge aluni iha dhininwa pokwena kwe.

Amathekie okwa li a toto nuupenda noku tula mo okoola ndjoka ya li ya nyanyudha aayambidhidhi mboka ya li pokapale.
Eyalulo olya li 1-0 pokafudhepo na Pirates okwa li ta monika a tyololoka noyendji oya li ye wete kutya Young Chiefs ota likola esindano ndyoka inaa likola sigo onena nkene oliha ya tamekele.

Ashike manga owala kuna ominute 10 opo uudhano wu thike pehulilo omudhani gwokonima gwaYoung Chiefs okwa li a likitha iilya konima sho a li a gandja po etanga komudhani gwoPirates popepi nokoola yawo ngoka ina kwatakwata sho a li a patulula omundilo nomukwati etanga okwe ke li mona owala ta li galuka mokoola, noku dhenga ishewe aayambidhidhi yaAmathekie pomutima mboka ya li ya yuulukwa esindano.

Eyalulo pokahiya ka hugunina olya li Young Chiefs 1-1 Orlando Pirates noku etitha omaipulo mokati kaayambidhidhi yoYoung Chiefs kutya osigo uunake osipana yawo ta yi kala ngaaka.

Omudheuli gwoYoung Chiefs ngoka a li a galulwa paulumompumbwe Alex Iitumba okwa li a holola kutya ombepo yuukumwe mosipana oyi li pombanda onkene aayambidhidhi yaYoung Chiefs ina ya teka omukumo oshoka osipana otayi longo nuudhiginini opo yi galule omasindano ngaashi sha kala.

Young Chiefs oye ta etelele okano moliha yopombanda moshilongo a landulwa komushiinda she Chief Santos, Tigers FC naye okwa tameka nuunkundi nando oye enyakwa lyoliha ndjika.

LEAVE A REPLY

Please enter your comment!
Please enter your name here