Bulelo okwa hala ishewe yi ipe dhopomeho naMax

0
26

Shipi Elago

Ongwediva-Olugodhi ndoka lwa li lwa tegelelwa koyendji osho lwa dhanwa ongulohi yOlyomakaya ga zi ko poshinyanga shoCountry Club moVenduka pokati ka Max Iipinge na Hedison Nghipondoka ngoka a li a pewa nambwa.

Olugodhi ndoka lwa li itaa lu nuwa meya olwa li lwa thigi oyendji ye li othika oshoka omalume ngaka gaali oga li ta gi ipe dha kahandja pwaana ohenda.

Uudhano mboka wa li wa dhanenwa komeho gengathithi lyaatali oyendji owa li tawu hokitha nando Bulelo okwa li tali tapi unene tu momadhingoloko gotango gopetameko.

Bulelo okwa li e ya iimanako medhingoloko lyahugunina na okwa li e na ompito yoku dhenga Max yimwe nomiiyagaya ashike okamati haka oka gundjuka oka li ka kotoka na ina ke mu pa nando ompito opo eka dhenge.

“Ngame mwene ondiwete kutya otwa dhana shithike pamwe na onda li nda kumwa sho ndu uuvu kutya Max oye omusindani,” Bulelo ta popi neyeme oshoka oku uvite kutya na ye muuholo omo a li.

Okwa ti aagandji yiitsa oya li ya kutha ethimbo ele okupotokonona iizemo pokati kuudhano mbuka na oku uvite kutya uuyuuki ka wa li tawu pangele.

Onkene Bulelo okwa hala opo olugodhi lwe na Max lu shune mondambo oshoka ina tala nawa na okwa hala opo e mu pe yimwe nomiiyagaya.
“Otandi lombwele aaymbidhidhi yandje kutya ndika ha lyo ehulilo lyaBulelo ngame ondili nawa na ishewe molugodhi nduka inandi za mo nando nokapulu kasha, tsikileni no ku yambidhidha ndje oshoka esindano oshili,”Bulelo ta tsikileko nohamu.

Sakaria Lukas Desert Storm ngoka oye a li omuBokisi omunene gwesiku okwa li wo a sindana po uudhano we nomukondjithi gwe omuSouth Africa Dithebe Tello, omanga muudhano uutiyali uunene wesiku Jeremiah Nakathila okwa li a dhenge mo Sibosiso Zingange gwaSouth Africa yimwe nomiimbondi medhingoloko lyotango.

Harry Simon Junior na ye okwa li a sindana po olugodhi lwe ndoka lwa li lumwe lwomomalugodhi omanene gongulohi ndjoka.
Uudhano mbuka owa li wa unganekwa ko MTC Nestor Sunshine Boxing Academy, na owa li wa pata okaliindeli kuudhano woBokisa waSunshine womumvo nguka.

LEAVE A REPLY

Please enter your comment!
Please enter your name here