Dr. Mboko a pula aantu yakonaakonwe oHIV/AIDS

0
97

Maria Namupala

OSHIGAMBO-Omundohotola moshipangelo shopaumwene mOndangwa Michael Mboko, okwa ti osha simana okutseya mpoka wa thikama ngele tashiya kombuto yoHIV/AIDS.

Mboko ndhika okwedhi popi pethimbo taku dhimbulukwa esiku lyo HIV/AIDS muuyuni petameko lyomwedhi nguka.
Okwa ti esiku ndyoka ohali dhimbulukiwa muuyuni omumvo kehe, konima sho lya tulwa miilonga mo 1988. A ti ohashi kala sha simana opo aantu ya kale yeshi mpoka ya thikama nomukithi nguka, opo ya vule okupangwa mbala yo taya humu komeho noonkalamwenyo dhawo.
Pethimbo ta popitha aakwashigwana mboka yali ya gongala pokapangelo pOshigambo Mboko okwa yelitha kutya omukithi go HIV/AIDS ogwa konekwa tagu mana po aakwashigwana unene epipi egundjuka, no tagu taandele unene ishewe.

Esiku olya dhimbulukiwa kohi yoshipalanyolo okutseya uuthemba wuundjolowele, nohashi ningwa okudhimbulukwa mboka ya hulitha kugo ,mboka ya gumwa kugo nokugandja elongo oshowo etumwalaka moshigwana kutya osha pumbwa eigameno noshowo ina shi tongola mboka taya lumbu nago nenge shi ya nyanyale.

Ta ti olundji aantu kiipangelo ohaya kala ya tilako, nopoompito odhindji ohaya tindi okuya yaka konakonwe yo taya kala yeshi mpoka ya thikama. Okwa endulula kutya oshinima sheikonakonitho osha simana moshigwana, nomuntu uuna wa konakonwa oto vulu okutsikila nonkalamwenyo kuuna omalimbililo.

Mboko ta kumike aantu ayehe ya kale ya konakonwa yo taya endele pamwe nethimbo.
Ngoloneya goshitopolwa Oshikoto Henock Kankoshi naye okwali a popitha oshigwana esiku ndyoka. Nokudhenga omuthindo koongeleka dhimwe ndhoka kwa konekwa tadhi lombwele aantu ya ethepo okunwa omiti dhawo molwaashoka anuwa otaya galikanenwa etaya aluka.
“Yakwetu oshinima shika osha puka uuna wa monika omukithi nguka ino kambadhala okwe etha okudhinwa molwaashoka wa lombwelwa kutya oto galikanenwa, kala to galikanenwa ngoye tonu omiti dhoye dhokulelepeka,” ngoloneya a indile.

Okwa ti nonande omukithi nguka tagu taandele ethimbo nethimbo epangelo olya longa shomupondo okukwashilipaleka kutya olya gandja omiti dhokulelepeka kaavu mboka taya lumbu nombuto yo HIV/AIDS, yo ya vule ya tsikile nokukalamwenyo.

Okwa ti aantu mboka yeshi mpa ya thikama ohaya kala yeli nawa yaana omalimbililo nomangwangwano, naaluhe ohaya ningi omatokolo geli mondjila. Okwi indile aakwashigwana ya kale omeho gepangelo okulopota oongeleka ndhoka tadhi indike nokulombwela aantu ya hulithe po okunwa omiti dhawo, a ti oshinima sha puka noonkondo.

Kankoshi okwa kumike mboka ya monika omukithi ngoka kutya hasho ehulilo lyuuyuni, onkalamwenyo otayi vulu okulelepekwa, uuna wi iyutha komalombwelo goondohotola, no to nu omiti dhoye ngaashi shu uthwa. Ta ti epangelo otali longo pamwe niipangelo yopaumwene oshowo iikondo ya yooloka okukwashilipaleka kutya etaandelo lyomukithi nguka olya shunithwa pevi, nomiti odha andjakanekwa niitopolwa ayihe moshilongo.

Mesiku ndyoka, olweendo olwali lwa tameke nomunyanyo, sho taya imbi oondjimbo opo oshigwana shi kale sha tonata ethimbo alihe, sho shi tseye mpoka sha thikama.

LEAVE A REPLY

Please enter your comment!
Please enter your name here