Filly-zo a nyanyudha oyendji pOmashaka

0
45

Maria Namupala

OMASHAKA-Omuhikingalo Fillemon Angombe a tseyika nawa Filly-zo okwa nyanyudha oyendji ehuliloshiwike lya piti pOmashaka mOndangwa. Shika osha ningwa pethimbo ongundu yokuhika oongalo yo Young Kasi yali tayi pititha oalbuma yawo.

Ongundu yaaholi naayambidhidhi yoongalo dhe oyali ya gongala nokwe ya nyanyudha, molwaashoka okwali ta ulike oshitalenti she nuunyakwa we mboka e na. Engathithi olyali lya shambulwa koongalo dhe noyendji oya kala taya pula a shuneko kostage.

Pethimbo lyoshiindingili shoka ongundu yo Young Kasi oya pititha oalbuma yawo ontiyali, ndjoka tayi ithanwa The Reborn. Fillyzo okwa kala ha hiki nokwiimba oongalo pamwe noYoung Kasi ashike omumvo gwaziko okwali a tokola opo a thigepo ongenga ndjoka, noku kale iithikamena. Nonande ya topoka ngaaka onkene haya longo muukumwe no taya kwatathana omathimbo nomathimbo.

Filly-zo ta ti shika hasho oshikando shotango ta mwenyeke pOmashaka, oha kala noku mwenyeka piituthi ya yooloka meni lyOndangwa oshowo kondje yondoolopa. Young Kasi okwa pititha oalbuma ye ehulilo shiwike lya zi ko mpoka pwali woo aahikingalo oyendji.
Young Kasi ongundu ya thikama po maamati yaali, noya kala taya kondjo nuudhiginini okukwashilipaleka kutya ayihe oyapwa okulongekidhwa, no albuma yawo oyili momalandithilo ngaashingeyi tayi monika pomahala ga yooloka moshilongo ashihe.

Oalbuma ndjika oyi na ondumba yuungalo owundji mboka Fillyzo a yelitha kutya omuna etumwalaka tali mwenyeke no kukumika omupulakeni a kale ena einekelo mu ye mwene, nokwa pula kehe gumwe a kale eyi imonena nokupulakena etumwalaka ndyoka tali tungu.
Okwa ti oya longela pamwe nomakanda ngoka uule woomvula odhindji, nohaya tungathana miinima oyindji unene yonkalamwenyo, nonkene yena okuyela noku ukitha komeho omuthika goongalo moshilongo nopondje ya sho.

Kakele ko albuma ndjoka yo Young Kasi, Filly-zo okwa pititha oalbuma ye yotango, nokwati okwi ipyakidhila nokunduluka oalbuma ye ontiyali ndjoka a ti otayi kala ya pita mbala.

“Molwaashoka sho twa topoka no Young Kasi inatu nyenyeta, otwali owala twa tokola tu topoke tse tu ilongele molwaashoka oshetu ningile oshidhigu sho hatu kala moondoolopa dha yooloka omolwiilonga. Otatu kala tatu longele kumwe tse tatu itulile mo nelalakano okutungathana po moonkalamwenyo dhetu,” ta gwedha po ngaaka.

Okwa pandula aayambidhidhi ye mboka yali ya holoka ehulilo shiwike lya piti, te ya indile ya tsikile okupulakena oongalo dhaahikingalo yomoshilongo, nokudhi simaneka wo. Okwa pula aahikingalo aaNamibia ya longele kumwe yo taya kala noku yambidhidhathana noku paathana omayele ngoka taga tungu aluhe.

Aahikingalo yalwe mboka ya mwenyeke poshiithanene shika oyo Shitana, Bantu, King Mex, Omfally, naD-Square.

LEAVE A REPLY

Please enter your comment!
Please enter your name here