Moshitila Mwa Z’Ondjupa : Okutonatela iinima moolaka pamayalulo

0
27

Iinima yimwe nde yi popi metetekelo notandi ke yi popya natango, omunangeshefa a kale lela e shi shoka hashi inyenge mongeshefa ye, ye e shi tseye opo ongeshefa ye yi vule okuhuma komeho, okwa pumbwa okuninga eyalulo lyiilandithomwa ye ethimbo nethimbo. Eyalulo olyo okuyalula iinima mbyoka yi li mongeshefa. Eyalulo kali shi oshinima oshidhigu. Omuntu otashi vulika wu shi tile, molwaasho inoo shi ninga nale. Iinima sho tayi landwa po, oyi na nale mondjila moka tayi ende, ano tayi ende komashina, ngoka taga ulike; [i] omwaalu gwiinima mbyoka ya landwa mpoka gu thike [ii] omwaalu gwiimaliwa yiilandomwa mbyoka, [iii] omwaalu gwiinima mbyoka ya thigala mo mongeshefa [iv] nomwaalu gwiimaliwa yayo mpoka gu thike.

Omunangeshefa ngele to ningi omayalulo itashi ti kutya andola wu mone owala kutya mpaka opwa li oothewa ntano, ngashingeyi opena oothewa ndatu, ihe tala wo kutya iinima mbi yi li mo oyi na iimaliwa yi thike peni, iimaliwa yiinima mbyoka wa landitha mo oyi li ingapi.Tula nduno kumwe, opo wu ka yelekanithe nomambo goye kutya, owa li wa landa neyalulo lyiimaliwa yi thike pontumba pongandi, niimaliwa yiinima mbyoka ya kala mo, oyi thike pontumba pongandi. Mokuyalula kwoye oto vulu nduno okutala kutya iinima mbyoka sho to yi tula kumwe, owa longitha oopelesenda ngapi dhokiinima ayihe.

Mokuninga ngaaka oto ka dhimbulula nduno kutya, eyalulo ndi li li po olya kanitha, oshoka omwaalu gwiimaliwa yiinima mbi ya li yi na okukala mo, hayo yi li mo, ishewe mbi ya za mo omwaalu gwiimaliwa omushona. Ngashiingeyi sho to yalula poolaka iinima mbi yi li mo oyi na ashike iimaliwa iishona. Shoshene ohashi monika nuupu, kape na nando omalimbililo gasha nandenande. Omuntu owu na okuyalula wa tala kiinima yomoolaka oshoka moolaka ngele owa adha mwa yakwa oothewa, oto dhi dhimbulula mbala kutya mpaka opwa yakwa. Olwindji shoka tashi ku pe uuyelele wa gwana , okuyalula niimaliwa yiilandithomwa mbyoka yi na okukala moolaka. Pamukalo gwa tya ngaaka, opo to adha etsokumwe meyalulo lyoye.

Uuwanawa wokuyalula iilandithomwa moolaka, oku ku kwathela ngoye omunangeshefa, wu tseye ngele owa pumbwa wu ka lande iinima noto ka landa yi thike peni. Okuyalula hoka ohaku ku kwathele wo okutala kutya iinima owe yi eta mo ethimbo lini. Oya kala mo ethimbo li thike peni, osho wo oya hokiwa tuu nenge inayi hokiwa. Mokuyalula oto vulu wo okumona kutya iinima mbyoka oyi na oshilonga, noto vulu okugwedhela ko, nenge okukulula ko, uuna omambesitelo omape taga ka ningwa.

Oshinima shoka hashi landwa meendelelo, oto mono nkene ho shi mbesitele olwindjilwindji.Iinima mbyoka ihaayi landwa, oto mono sho ihoo yi mbesitele olwindji, shila okonima yoomwedhi ndatu, omanga konima yoomwedhi ndhono ndatu to ka mona kutya shimwe owe shi mbesitela iikando iyali, shimwe iikando itano, oshikwawo iikando ihamano. Oshinima shoka wa mbesitela iikando ihamano, otashi ku ulukile kutya osho sha hokiwa kaantu. Okuza mpoka osho to kala ho mbesitele oshindji oshoka owu shi kutya ohashi landwa.

Shoka nda zi nokuhokolola paufupi, osho sha kala oshuukithi shiilonga mokungeshefa kwandje.Iitsa yimwe mbyoka onde yi tula mpaka mondjuulukwe yandje, yokunongopalitha aanangeshefa aakwetu, mboka nda zi nokupopya, oyo ekota lyuudhiginini, lyetonatelo nolyesindano molugodhi lwuunangeshefa

LEAVE A REPLY

Please enter your comment!
Please enter your name here