Neshuku a uvaneke okuyakula oshigwana

0
84

Maria Namupala

ONAMISHU-Protasius Neshuku ngoka a ganithilwa iilonga yuukansela moshikandjohogololo Eengodi okwa uvaneke taka longa nuudhiginini okufala oshikandjo shoka komeho.

Pethimbo ta ganithilwa miilonga kuMangestarata Petrus Nangula, Neshuku okwa uvaneke taka longa muuwanawa woshigwana, ye ta kwashilipaleke kutya ota tsikile mpoka nakusa Walde Sheyavali a hulile, noku eta wo omahumokomeho ngoka ga pumbiwa.
Okwa ti ota pandula nakusa Sheyavali ngoka a longa nuudhiginini nomikunda nomahala ogendji okwa si ega adha nokwa longela ko omauwanawa ga yooloka. “Otandi gana mpaka nena kutya otandi ka longa shi ikwatelela kekotampango lyoshilongo, noku gwanitha po iilonga yandje ngaashi shu uthwa,” Neshuku ati ngaaka.

Okwa ti nonande oshikandjohogololo shoka osho shimwe sha taalelwa komashongo ogendji, shoka itashi ya imbi okuya komeho otaya kambadhala kehe shoka taya vulu ya kwashilipaleke kutya uuwanawa owa hedhithwa popepi noshigwana, yo aakwashigwana ya tyapule emanguluko lyoshilongo, yo taya lolo wo oshikwiila shemanguluko.
Neshuku okwa longo pamwe na nakusa Walde, nokwa kala oye omukwatakanithi gongundu yoSwapo sigo opethimbo ndika sho a inekelelwa oshilonga shuukansela.

Okwa valelwa momukunda Ashimbamba moshikandjohogololo osho tuu shoka, nokwa kala omukwatakanithi uule womimvo 12 lwaampoka.
Okwa uvaneke taka longela pamwe noshigwana, nokuyakula ayehe, ye ta kala ta pulakene omaiyuvo gaakwashigwana ye, noku tala kutya omikundu nomashongo ngoka geli apehe otaye ga palamene ngiini.

Oshikandjohogololo Eengodi oshina oosenda tadhi ihilile po 23, nokwa tegelelwa kuka gwedhwe dhimwe, molwaashoka dhimwe oonene nodhina aakwashigwana oyendji unene.

Nakusa Walde “Chief” Sheyavali okwa kala kansela goshikandjohogololo shoka oku za sho oshilongo sha manguluka. Okwa manene oondjenda dhe momasiku 21 Aguste nuumvo, mepipi lyomimvo 60 moshipangelo Ongwediva Medipark.

LEAVE A REPLY

Please enter your comment!
Please enter your name here