Omalelo goondoolopa ga hogolola oomayola

0
50

Maria Namupala

ONIIPA- Omawiliko goondoolopa dhomuumbangalantu oga hogololola ishewe aakwateli komeho mugo, ngaashi hashi ningwa pehulilo lyomumvo kehe.

Oomayola pamwe newiliko lyoondoolopa dhawo oya ganithilwa miilonga momukokomoko goshiwike shika, moka omo woo mwa ningwa omahogololo nomalunduluko, konyala oomayola oyendji oya ganithilwa miilonga esiku olyo tuu ndyoka, noku ninga omauvaneko gawo.

Osha ningi ondjokonona mondoolopa ya Tsumeb sho Mathews Hangula ngoka eli omugundjuka elela a hogololwa oye a ninge meya gondoolopa ndjoka, nokukwatela iilonga ayihe komeho. Hangula okwa pingenepo Veueza Kasiringua, ngoka lele owala uule woshikako shomumvo gumwe.
Hangula okwa kala meya gopevi naashi iinekelelwa oshilonga shika oku uvaneke taka longa ngaashi shu uthwa noku gwanithapo iilonga ye ayihe, ye ta kwashilipaleke kutya okwa gandja omayakulo koshigwana shomOshomeya, shoka sha pumbwa omakwatho ethimbo kehe.
Ingenesia David,okwa hogololwa a kale omupevi mayola,Peter Shaanika oye e li omunashipundi niilyo yilwe oyo Daniel Venaani, Lineekela Sheetekela, Matias Sipunga naangoka a li mayola Veueza Kasiringua.

Shika osho woo sha ningwa mondoolopa yOndangwa mono iilyo pamwe namayola Paavo Amwele yi li ngaashi yili, inaa yi lunduluka. Saima Namukwambi onkene eli mayola gopevi, Andreas Kalumbu eli omunashipundi gokansela, iilyo yokomitiye yomutumba oya kwatela mo Anna Helena Itope, Abed Paulus, Leonard Negonga osho wo Joseph Martin.

Moshipopiwa shetaambeko lye Amwele okwa ti okwa pandula ewiliko lye ndyoka a longo nalyo uule woomwedhi 12, no ye mu kwatha moku etapo omadhiladhilo taga humitha komeho ondoolopa, nokuyi kaleka muuyogoki yi kale yimwe yomoondoolopa tadhi nana aatalelipo naangeshefa moshilongo.

Mondoolopa ndjoka opo ya dhikilwe po yOniipa nasho osho sha ningwako, sho mayola Immanuel Mannetjie Kambonde a galulilwa oshipundi she shuumeya, ta kwathelwa ku Laina Iikali, Thomas Matsi eli omunashipundi, omanga iilyo yilwe oyo David Kambonde, Hileni Idhogela, Jafet Augustus na Laina Amutenya.

Kambonde okwa hokolola kutya oompangela noonkambadhala dhokuhumitha komeho Oniipa yi kale ngaashi ondoolopa ndhoka dha kalapo moshilongo otadhi pula komeho, ta ti otaya lalakanene ondoolopa ndjoka yi kale yi na omahumokomeho tagi imonikila. Ta ti oshi li oshinakugwanithwa shawo oku kwashilipaleka kutya aakalimo yomondoolopa oya mona omayakulo ngoka ya pumbwa.

Okwa gwedhapo kutya momukokomoko gomumvo nguka elelo lyondoolopa olyali lya pewa iinakugwanithwa oyindji mbyoka yi na okulongwa nokugwanithwapo. Mayola ta tsikileko tati oya adha yimwe yomiilalakanenwa yawo, noye wete kutya nonande taya ende nokunana nuudhigu otaya kambadhala ngaashi taya vulu.

Ta ti ondjodhi yawo ndjoka tayi kalelele okugandja omagumbo nomahala gomalukalwa kaakalimo yomondoolopa, Mayola ta kwashilipaleke momukokomoko goomwedhi 12 dhili komeho elelo lyondoolopa olina omutungilo guli nawa hoka taya kala yi ikankamekela.

LEAVE A REPLY

Please enter your comment!
Please enter your name here