Omimvo 20 mokakuma sho a kwata okanona onkonga

0
56

Loide Jason

ONGWEDIVA-“Nonando kwa kala nokulondodhwa kutya oonakukayula onyanga otaya pewa egeelo lya kwata miiti, sigo kepaya taku tululuka, onkene ngaa uukolokoshi nomahepeko paihulo gaanona taga londo, na ngashinegeyi oga adha ondondo ndjoka itaaga vulu we oku idhidhimikilwa. Ano ita shi halutha ngele oshigwana tashi pula opo aakolokoshi mbaka ya pewe egeelo lya yaga komuntu, nongele sha tameke okunyenyeta, ngele mbaka ina ya pewa egeelo lya kwata miiti,”

Ngaka ogali omatumbulo ga hahende gwepangelo Nelao ya France sho a pula opo Mangestalata Leonard Hangalo a gandje egeelo lyomimvo 20 kunakukwata onkonga okanona komimvo heyali.

Mangestalata Hangalo okwa zimine nahahende nguka gwepangelo sho shili a gandja oomvula omilongo 20 komuhepeki paihulo mEtitano yoshiwike sha zi ko mompangu yopashitopolwa yaShakati.

Lukas Gervasius Nghishikomesho omunamimvo omilongo 21 okwa monika ondjo sho a kwata okanona hoka koonkondo ete ka longele iilonga yuushanda omanga kali taka iwatele poluhwa.

Oshiningwanima shika oshali sha ningwa momasiku 16 ga Desemba 2014 pomukunda Oshityani.
Omupanguli mohofa Leonard Hangalo okwa hokolola kutya omukwati nkonga nguka keli pandondo yokukala momukunda onkee okuna okugeelwa opo a se ohoni yaashoka a longa.

Omukolokoshi nguka okwa li a lombwelwa kutya kuushona ngaa wa nakuningilwa omuyonena oko ngaa kegeelo lili pombanda.
Nguka okwa hokololwa anuwa sho a kwatwa ta longo omuyonena a fadhuka po shoka wo sha uvitha nayi omupanguli .
“ Omukolokoshi nguka okwa li a longitha oonkondo dhe ndhoka e na okuyaumbula po okanona haka, eka umbile pevi , ndele ta longo omuyonena ngoka,” osho omupanguli a hokolola .

Omupanguli okwa hokolola kutya esiku ndyoka onzigona ndjika oyali tayi ikwathele kaaya li yishishi kutya otayi vulu oku ningilwa omuyonena.

Hangalo okwa popi kutya momukokomoko aguhe ngoka omukolokoshi nguka okwa kala nokupukitha ompangu kutya okanona haka oka zimina okuningilwa omuyonena ngoka.

“Okanona haka oka lombwele ndje kutya nandi ye ndi kalale. Shika okushishi kutya ndika ehokololo ashike eli tota po na olili kokule nuushili , shoka sha etitha nokuli opo okanona haka keye kompangu opo keye ka hokolole shoka sha ningingwa po,” osho omupanguli a ti ngaaka omanga eli mokati kokugandja egeelo ndyoka komukolokoshi nguka eli ilongela.
Hangalo okwa ti Lukas okwa ka popya ashike sho aantu yeli mokati komahokololo sho epangelo tali gandja uumbangi kutya okuna ondjo na omunona nguka haye a gandja epitiko oku kwatwa onkonga.

“Onkee shika itashi pitikwa nande nande kompangu oku mwena ngele tashiya kutya omunadholongo nguka omahokololo ge oga monitha na ku ningilwa omuyonena uuwinayi wopamadhilaadhilo,” osho Hangalo a ti .

Onkee okwa tokolwa kutya oshoka ekwato nkonga unene lyaanona aashona olya londa moshilongo onkee kapuna ohenda nande nguka okuna oku pewa oomvula omilongo 20 mondholongo.

LEAVE A REPLY

Please enter your comment!
Please enter your name here