Onambula Young Generation oyo enyakwa lyOm`chain

0
38

Shipi Elago

Tsandi-Ehuliloshiwike lya zi ko omapu oga li ga zi moongongo konima sho osipana yOnambula Young Generation ya ningi enyakwa lyuudhano wekopi lyOm`chain mokudhengamo Young Brave medhingoloko lyahugunina.

Onambula Young Generation oya kula oosipana oonene mOmusati omayego noku sindana po ekopi ndika lya li lya nana konyala oosipana 12 dhomoshitopolwa shaMusati.

Edhingoloko lyahugunina olya li lya dhanenwa pokapale kaTsandi hoka ka li kuudha noonkondo aayambidhidhi yOnambula Young generation.
Shiti okwa li ta tekele mbundje oshoka nando oosipana ndhika mbali Young Generation na Young Brave odha li adhihe dhi na enota lyo kusindana ekopi, oosipana adhihe odha li dhi na oonkondo dhi thike pamwe na ka shali oshipu oshoka aakeleli yomokoola oya li ayehe taya kelelitha oombati sho oosipana adhihe dha li ta dhi keelelwa pokoola.

Eyalulo olya li 1-1 poka hiya ka hugunina onkene oosipana ndhika odha yi kokutsikinika opo ku talike ngoka ta yi nekopi.
Omukwati gwoYoung Generation okwa li uupathi mokoola na okwa kwata mo opelenti yimwe yo Young Brave noku etitha ekuyunguto nuumbanda mokati kaadhani yoYoung Brave.

Kaptein Paavo, Enos Adebayor Max ,Uunona Simaneka na Natangwe Tox Katoma oya li ya thanga noku tula mo oopelenti dhawo ne ndhoka dha eta eyalulo lya hugunina li kale 4-3 noku pa Onambula Young Generation ekopi lyotango mondjokonona yosipana ndjoka.
Onambula Young Generation oya li ya fadhuka po no kapandi kooN$6 000, ekopi,noombandi dhoshingoli.

Young Brave oya pewa okapandi kooN$3 500, noombandi dhoshisiliveli.
UNAM Ogongo okwa li a pewa olupandu lwooN$2 000, sho a li eya omutitatu mekopi ndika omanga Onambula United ya li ya hekelekwa nokashona kooN$1 000.

Shaanika David ngoka e li omuhikihiya e shiwike nawa mokatanga kokoompadhi moshilongo naangoka oye ha kwashilipaleke uudhano mbuka okwa ti okuna ehalo opo uudhano mbuka wu koke nokuya pombanda monakuyiwa opo wu vule okunana oosipana dhilwe oonene moshilongo.
Okwa ti uudhano mbuka otawu kala hawu dhanwa aluhe omvula kehe na otaya ka gwedhela oshimaliwa omumvo kehe.
Ota pandula wo ayehe mboka ya kala noku yambidhidha uudhano mbuka okuza petameko sigo opehulilo.

Shaanika ota hiya aanambelewa yoosipana oonene opo ya kale haya kala pomaudhano ngaka opo ya tale ngele otaya mono mo aadhani ta ya opalele oosipana dhawo.

LEAVE A REPLY

Please enter your comment!
Please enter your name here