Ooyene yomikunda aape ya langekwa mOngandjera

0
263

Loide Jason

ONGWEDIVA-Ooyene yomikunda 21 oya langekwa kOmukwaniilwa gwoshilongo shaNgandjera mOlyomakaya ga ziko pombala yomukwaniilwa pUukwandongo.

Shika otaku hokololwa osho oshikando shotangotango ookapatashu taya langekwa moshitunda shaNgandjera moshikandjohogololo shaKahao moshitopolwa shaMusati.

Omugandjimayele gwoMukwaniilwa ngoka a yi moonkundathana na Kundana pangodhi, Hiskiel Kamati, okwa ti shika osho oshikando shotango mondjokonona yaNgandjera na oshi li esimano enene kwaamboka yeshi ningilwa.

Kamati okwa ti omukwaniilwa sho a langekwa mo2015 okwa li a lombwele aanamikunda ya ulike aaleli yawo mboka ya hala na oya inekelwa unene momikunda ndhoka dhina omwaka.

Ashike yamwe yomaanamukunda oya li ya talelepo ombala mpoka yali ya holola kutya aaleli yawo mboka oyo ooyene yomikunda kayali taya ulike aa inekelwa onkee oya hala okuhogolola aaleli yamwe.

“ Shino tatekulu okwa li eshi pitike naanamikunda oyali ya hogolola mboka ya hala noshowo mboka ya inekela yo yene onkee nduno aayehe mboka oya langekwa Olyomakaya,” Kamati osho a hokolola.

Okwa tsikileko a ti mboka yali aapeha yooyene yomikunda noshowo ooyene yomikunda mboka aakulu na oya inekelwa kaanamukunda yawo nayo woo ina ya lundululwa.

Okwa ti mboka ya langekwa oomboka ashike aape mboka ya ya pomahala goonakusa noshowo mboka ya ulikwa etaya ziminwa pamulandu gwelelo lyopamuthigululwakalo .

Oshitunda shaNgandjera oshimwe shomiitunda yAawambo shoka shi na aantu oyendji noshowo omikunda odhindji.
Oshi li pokati kUukwaluudhi nUukwambi sha gama Uukwaluudhi kuumbugantu sho tashi gama Uukwambi kuuninginino.

LEAVE A REPLY

Please enter your comment!
Please enter your name here