Oshana Basketball ye edhila omumvo negandjo lyomapa

0
12

Shipi Elago

ONGWEDIVA-Oshiputudhilo shoku dheula aadhani yobasketball mOngwediva shoka sha li sha totwa po nuumvo moonkambadhala dhehangano lyoBasketball moNamibia okuhumitha komeho uudhano mbuka moshilongo otashi humu nawa komeho na osha li sha pata omumvo 2017 noshituthi shomapapa.

Oshiputudhilo shoka sha fa oshikwawo shokoVenduka oshi na ngashiingeyi omwaalu gwuunona 15 wa za mondondo ontine sigo ontiheyali moosikola dhomOngwediva .

Endiki ndika ohali yakula uunona mbuka konima yootundi omasiku gontumba moshiwike moka haya pewa ootundi dhoBasketball dha tulwa mumwe nelongo lyonkalathano.

Omuwiliki gwendiki ndika Pondo Nailenge okwa li a hola kutya uunona shampa wa taambwa mopolohalama ndjika ohawu pewa okondalaka moka hawu shaina nokugana kutya otawu kiiyutha koompango dhoshiputudhilo ndhoka olundji hadhi kala dha yaga kegonga.
Okwa ti ngele okanona okashaina nena okategelelwa opo ka ka kale ta ki iyutha komilandu ndhoka dha tulwa po nongele inaka iyutha nena oshilanduli oha shikala oshinene.

“Oshana Basketball oyi na etumwalaka ndyoka li shiwike kuunona awuhe ha wu kutha ombinga ndyoka hali ti Osikola tango Obasketball ontiyali, shika otwe shi ninga opo aanasikola yaa kanithe ohokwe miilonga yawo yosikola yo ya kale ashike ya taalela moBaskeball oshoka osikola oyo emanya lyokolonela monkalamwenyo yomuntu kehe,”Pondo ta ti.

Uunona awuhe ohawu pewa iikwathithilongo ngaashi omambo, oopena uushina nosho tuu, opo ya nkondopaleke elongo lyawo, omanga kombinga yoBasketball ohawu pewa omatanga nosho wo iizalomwa yoBasketball opo wo ya nkondopaleke ontseyo yawo yobasketball.
Konyala uunona owundji owa li wa pewa omapapa miilonga yawo yosikola nokudhiginina ootundi dhawo dhoBasketball pendiki.

Pondo okwa holola kutya Oshana Basketball school otayi nana nondatu molwompumbwe yoshimaliwa na ina yi fa oshitayi oshikwawo sho ka shi li moVenduka oshoka shiya oshi li mekwashilipaleko lyaGIZ.

Onkene ota indile aanangesefa naantu koohandimwe opo ya yambidhidhe oshiputudhilo shika naashoka ye na opo shi vule oku adha omalalakano gasho.

Oshiputudhilo shika osha patulula oshitayi shimwe kOshakati posikola Erundu mpoka uunona okuza pondondo ontine sigo ontiheyali hawu pewa omadhewo goBasketball kaa iyambi ya za koNdowishi mboka ha ya kala po etitatu kehe.

Pondo okwa ti oyi ipyakidhila oku eta po opolohalama yiilonga yomvula tuuka moka ya tula mo ethigathano lyoBasketball lyoosikola dho pombanda ndyoka lya tegelelwa li ka tameke kuyele omvula tu uka.

Osikola ndjika yoBasketball oyi na ombelewa yi li pekondeyina embulawu lili konima yoSam Nujoma Multi-purpose center mOngwediva, mpoka yi na aadheuli ye li yaali naanawino mboka haya talele po endiki ndika ethimbo nethimbo.

LEAVE A REPLY

Please enter your comment!
Please enter your name here