Otaku ka tungwa omandiki goongulu dhiikulunima gaali

0
15

Maria Namupala

ONDANGWA-Omukuluntu wiliki gwehangano lyoomuseuma moNamibia Jeremy Silvester okwa ti ehangano ndyoka otali ka tunga omandiki giikulunima gaali mbala.

Silvester okwa popi ndhika oshiwike shika moVenduka pomutumba gowina gwehangano ndika. Moonkundathana dhe naKundana Silvester okwa yelitha kutya oya tula miilonga opoloyeka yokunkondopaleka noku yelula omuthika gwomithigululwakalo, oohedhi nuungomba moshilongo, oshowo uuthemba womithigululwakalo dha yooloka.

Pethimbo lyoonkundathana okwa yelitha kutya ehangano olya thaneka li kale lya tunga omahala giikulunima gaali.A ti limwe otali kala lya tungwa mOmuthiya, na limwe otali tungwa moKatima Mulilo.

Omandiki ngoka okwa ti otaga kalele, no taga kala taga longithwa koshigwana ethimbo kehe. Okwa ti kakele komandiki ngoka otaku ka kala woo kwa tungwa omandiki omashona gopakathimbo hoka taku kala taku yiwa omalupita, opo oshigwana shi tale noku tseyithilwa omithigululwakalo.

“Otatu lalakanene okunkondopaleka omithigululwakalo moshilongo shetu, okudhikaleka po nokudhi yambula po dhi kale dhili pamuthika. Momandiki muka otamu ka adhika omathano giihongomwa yopamuthigululwakalo, omathano gaaleli yopamuthigululwakalo noyopashigwana, omathano giikulya yopamithigululwakalo dha yooloka, nakehe shoka sha pamba noshi li pamuthigululwakalo,” Silvester a ti.

Okwa ti omandiki ngoka otaga ka longithwa kaaNamibia oshowo kaatalelipo mboka taya kala noku enda ethimbo kehe, yo taya tala noku ilongela ko omithigululwakalo. Otamu kala hamu ningilwa iinyangadhalwa ya yooloka ngaashi iinyandwa, oondanisa, uudhano wopamuthigululwakalo, na kehe shoka tashi gandja enwethemo ewanawa kombinga yomithigululwakalo, oohedhi nuungomba.

Agundjuka mboka haya longo nokunduluka iihongomwa koonyala dhawo oya tegelelwa nayo ya kale taya gongala komandiki ngoka, yo taya paathana omayele nkene ye na okuyambula po omithigululwakalo. Silvester ta ti oshilongo shaahena omuthigululwakalo oshafa olweendo lwa tumba lwaana mpoka lu uka. Onkene ehangano olyu uvite etumba no tali kondjo opo omidhi dhomithigululwakalo dhi kale dha kola dho itadhi tokoka.

“Omithigululwakalo etumba lyookuku yeli tu thigila tu vule okwiilongelako nokwiilonga mosha, tse tu vule woo tu longe aamwetu, komidhi hoka oko twi ikolelela, notandi pula aanaskola ya kale noku talela po omandiki ngoka taga adhika momidhingoloko dhawo, opo ge ya kwathe meilongo lyawo,” Silvester a tsikile ko.

Ta tseyitha kutya ehangano otali ka longa muukumwe nuUuministeli wElongo, oohedhi nuungomba, mokuthikamitha po omandiki ngaka koshimaliwa shoomiliona N$ 3.7.

Opoloyeka ndjika otayi kala ya manithwa mo 2019.
Silvester okwa itaala kutya omandiki otaga eta elunduluko enene maakwashigwana, molwaashoka otamu kala woo tamu gandjwa omalongo kombinga ye simano lyomithigululwakalo nonkene dhina okukalekwa po.

LEAVE A REPLY

Please enter your comment!
Please enter your name here