Oupika neladifo lovanhu moLibya – Ounyuni otau ningi po shike?

0
25

Efikilo lomutumba woIwanahangano wali ko oshivike sha dja ko li na sha nonghalo yomoLibya otali udifa nai.
Oshivike shadja ko okangudu keameno koiwanahangano hano o UN Security Council oka ninga omutumba wopaulumomhumbwe nelalakano okutala ngeenge otapa dulu pa tulwe eendjidikila, tadi tulilwa po ovo tava kufa ombinga moshinima shokulandifa noku landa ovanhu moLibya.
Onghatu oku ninga omutumba ou, oya li edilaadilo liwa, noili oshinima osho sha li sha pumbiwa oku ningwa. Ashike ota shi udifa nai eshi okangudu oko ka dopa oku hanga efikilo nokuninga etokolo moshikumungu omu.
Efiku nefiku ovanhu otava landifwa, voo tava dipawa moLibya.

Nokuli Nikki Haley oo eli Ambassador waAmerica koiwanahangano okwe shi popya mefano la yukilila eshi a ti:
“Okutala omafano ovalumenhu ava tava fandifwa vafa eengobe, noku pwilikina omuhahidi eshi ta ingida ‘omumati ena eenghono wokulonga mofaalama…’ oshinima shina ngeno okutu kumwifa atushe”.

Otaku hokololwa moLibya mwa monika eenhele da fika hanga pomuwoi omo hamu hahidwa ovanhu, ovo veli ovaendanandjila vadja koilongo imwe yaAfrica.

Ovaendanandjila ovo hava kala nelalakano lokutavakana moLibya okuya koEurope, otaku hokololwa hava kwatwa po ombabyona moLibya nokutwalwa keenhele domangeshefelo oko haku landifwa ovanhu.

Ondado yomunhu umwe moLibya vati oi fike lwopo N$5 400 hano po USD400.
OvAfrica ava hava di unene moNigeria, ova kala noku tula eemwenyo davo moshiponga eshi va kala hava tauluka efuta lapindja laMediterranean neembautu odo da nyika oshiponga nelalakano vaka konge ouxupilo kondje yomafuta, tava pitile moLibya.
Nonande eemwenyo davo da kala nale moshiponga, onghalo yavo paife oya naipala unene, eshi veli hanga monghalo omo va fa eedi tadi taulula mokati komambungu shaashi vamwe vomovaLibya va dimbulula omhito iwa okudiilila melandifo lovanhu.

Luhapu, ovalumenhu novakainhu ava ohava shakenekwa keengangala odo hadi va heke kutya otadi va monene ondjila oyo ili nawa opo va tauluke efuta. Ava ohave ke lihanga nee monghalo omo tava nyekwa oinima yavo, tava kwatwa onghonga, tava dipawa nokulandifwa po meefandifa.

Otaku hokololwa eenhauki dopaliko dili povanhu 450 000 da ya moEurope okupitila moLibya moule weedula nhatu da pita. Veli lwopo 3000 ova fila mefuta laMediterranean olo vati la nyika oshiponga, pefimbo tava kendabala oku li tauluka. Ashike paife eshi moshinima mweli dopa omambungu omoLibya onghalamwenyo oya naipala neenghono. Mopaife vati ovanhu veli pokati ko400 000 nomiliona imwe vati oveli va kondekelwa moLibya kookalyamupombo novakayuli vomhango yopaiwana veameno lomunhu.

Ounyuni owa fikama tau pula opo pa ningwe sha mokuamena eenhauki edi, noku di mangulula okuya konamwenyo.
Ashike nonande ounyuni, ile ovakwaunyuni tava popi, notava holola eudonai lavo moshinima omu, omalutu oo ngeno taa dulu okupotokonona, okuhandukila ovo ve lile komesho oshinima eshi shi fifa ohoni, okwa mwena.

Ongonga yoiwanahangano, opo nee tai tameke oku tya kosha omafiku aa, olutu loiwana yaAfrica hano oAU oya mwena, vafa ashike vehe wete ko, noi otava ningi po sha. Unene tuu oAU, oyo ina oshisho shokuhanganifa, nokulwilwa oufemba wovaAfrica. Ohaku tiwa kahaluni nopeumba, yee vali ou eli konima yefiya iha udu oupyu womundilo, sha hala kutya AU ina teelela oiwana ikwao yokondje yaAfrica oyo i kwatele komesho exulifo po lofandifa yovanhu.

Omalandifo ovanhu noupika oinima ya xula nale eedula hanga 210 da ka pita. Ashike ngeenge Africa ita kotoka nokufikama po, otaka kolonyekululwa. Africa okwa pumbwa okufikama nokuhangana opo ku shilipalekwe kutya oukoloni noupika oo wa kwatela mo elandifo lovalaule inau alukila mo vali menenedu.

LEAVE A REPLY

Please enter your comment!
Please enter your name here