Tate okwali i taala shili muKalunga – Hosea Angula

0
523

Helvy Shaanika

Omupevi-panguli President Hosea Angula okwa hokolola he nakusa tatekulu Efraim Anyanka LyaAngula a li omulumentu e na elandulathano, nokwali e na eitaalo lya kola.

Tatekulu lyaAngula, omusita gwaElcin ngoka a li e na oshipewa shokugalikanena noku aludha aavu, nokutidha mo oompwidhuli noombepo dhanyata, okwa hulitha Olyomakaya gazi ko mepipi lyuukokele womutoko momimvo 101.
Sho a li ta popi niikundaneki pegumbo lyahe pOlukonda, Angula okwa ti he okwa li a itaala shili, neitaalo lye kalya li tali vulu okupatakanekwa oshoka olya li lya kola.

Angula ta ti ye naamwayina oya putuka unene metonatelo lya yina oshoka pethimbo yali aanona aashona, he okwa kala unene iipyakidhila noshilonga sheyakulo lyuusita.

Tate okwa longo onga omusita, a tameke sho ali omungundjuka lela, ena owala oomvula 26, nomoshilonga shoka sheyakulo okwa kala mo oomvula 72.

“Okwali e na omagano gokugandja etumwalaka (lyohapu yOmuwa) momukalo ngoka a li ha uvikiwa ko nawa,” osho omupanguli presidente gwopevi Angula a hokolola he.
Nangula Angula, ngoka omwana gwonkelo ya LyaAngula okwa dhimbulukwa omasiku ga he ga hugunina, ta ti okwali afa a ikutha ko kiinima yokevi.

“Oomvula mbali dha hugunina, ngele owe ya po puye kali we ha popi iinima yomuuyuni mbuka, shila oteku lombwele owala kutya Kalunga nekuyambeke, naasho to zi po puye, natango ote ku lombelwe ishewe kutya Kalunga nekuyambeke,” osho onkelo yaLyaAngula ya ti.
Omusita eli moshipundi shevululuko Johannes Mvula okwa hokolola kuume ke LyaAngula ali omunamagano meuvitho, omwiitaali, ngoka a hokitha aagundjuka oyendji yopethimbo lye, oshilonga shuusita.

Mvula ta ti nonando a li omushona okwa panga uukuume nomusita ngoka a li ena oshipewa shoku aludha aantu.
“Ye mwene sho a za kali naanaa a tseyikila okualudha, ihe konima sho a yi moshipundi shevululuko, a tameke oku ninga opologalama yaKalunga Kehekeleko Alihe (koNBC Radio) aantu oya dhimbulula kutya ngele teya galikanene ngawo mombepo oya kala nokumona omalunduluko moonkalamwenyo dhawo.

“Shoka osho sha etitha opo aantu ya tameke oku za koombinga noombinga, taye ya kegumbo lye ya galikanenwe,”
Nakusa LyaAngula ota fumvikwa ongula okuzilila mongeleka yaLukonda, noshituthihupulitho oshili ko nena natango pongeleka yaElcin pOlukonda.

Okwa thiga ko oyana 7, gumwe okwa tetekela nale, aatekulu, aatekululuwa naatekululuwa aatiyali ya konda po70.
Omukulukadhi gwe meme Maria Angula okwa hulitha nale muSepetemba 2015.

LEAVE A REPLY

Please enter your comment!
Please enter your name here