Aavu mOnandjokwe ya tyapula Okrismesa kuyele

0
116

Maria Namupala
ONIIPA

Aavu moshipangelo shaNandjokwe oyali ya nyanyudhwa oshiwke shayi sho ya longekidhilwa oshituthi shoKrismesa yokuyele kehangano lyoClouds Trading Enterprises. Ehangano ndika olya ninga oshinima shika omukalo ndjigilile kutya pethimbo lyomatyapulo nomatango omanene ohali longekidhile aavu oshituthi shoKrismesa, onkene nonuumvo osho lya ningi.

Aanuuvu mboka yeli moombete taya vulu okwi inyenga oshowo aanona ayehe yeli metonatelo lyaapangi , oya gongala pehalandjandja moshipangelo moka nokutyapula pamwe, oyali ya longekidhilwa omagano ga yooloka ogendji. Oya li woo ya pewa iikulya mbyoka ya telekelwa kaakuluntu wiliki yehangano ndika.

Omukuluntu wiliki gwehangano Claudia Mbura okwa yelitha kutya ehangano lyawo nenge eshona, olya thaaneke opo li kale tali longekidhile aavu moshipangelo Onandjokwe oshituthi shOkrismesa, yo ya nyanyukilwe pamwe, ta yelitha kutya shika oshikando oshitine (4) taya tyapula pamwe naavu moshipangelo moka.
Ehangano lyo Clouds oli inekelelwa okuteleka nokugandja omayakulo gokokombitha moshipangelo moka, nolya mono shoopala opo li gandjesha moshigwana..

“Ohashi kala oshidhigu unene komuntu eli moombete, no ita vulu okuka tyapula Okrismesa pamwe naakwanezimo lye molwaashoka ota mono epango, shino otwe shi ningi owina opo aavu yetu ya tseye nokumona kutya otuna oshimpwiyu nayo,” Mbura ta ti.
Mbura okwa ti shino oye shi ningi opo ya shunithe sha moshigwana shoka hashi ya yambidhidha. Ta gwedha po kutya elalakano lyawo okugandja woo ombili yokomwenyo kaavu, yo ya tseye kutya Clouds Trading okuna oshigwana komutima.

Omunambelewa mUuministeli wUundjolowele nonkalo nawa moshitopolwa shaShikoto, David Mulilo ngoka oye ali a popi peha lyomukuluntu guundjolowele moshitopolwa, okwa yelitha kutya ohashi kala oshidhigu omuntu ta tyapulile ethimbo lyomatyapulo moshipangelo, nonande ta yakulwa okwa pumbwa okuuvithwa nawa ngaashi ehangano ndyoka lya mono sho opala.

Mulilo okwa pandula ehangano ndika sho tali longo ngaashi tali vulu okugwanitha po iilonga yalyo mbyoka li inekelelwa koshigwana, ta pula woo omahangano ga yooloka niikondo ayihe moshilongo yi kutheko iiholelwa mbyoka iiwanawa, yo yi pungule moshigwana.
“Ohashi pupaleke onkalo yomuntu unene ngele eli moombete okukumikwa, oshowo okulongekidhilwa oshituthi ngaa shika, otatu pandula ehangano ndika omolwa eitulemo lyawo miilonga.Ehangano olya kala hali longekidhile aavu moshipangelo shika oshituthi shokrismesa konyala omumvo kehe no tatu pandula kwaashika,” ta ti ngaaka

Okwa ti otashi kwatha aavu yanwe oopela dhawo ya manguluka, molwaashoka omuna aasamalia aanamutimahenda ye ya na komitima. Okwa gwedha po kutya aavu oya pumbwa oku ningwa nawa moonkalamwenyo dhawo, noya pumbwa woo etonatelo ewaanawa. Yamwe yomaavu mboka yali ya holoka koshituthi shawo oyali ya nyanyukwa noonkondo, taya pandula aasamalia aanamutimahenda mboka yena oshigwana komutima.
Ta ya ti shoka ya ningilwa otashi lundulula oonkalamwenyo dhawo, yo taya kala nombili nomukumo oshowo eitaalo kutya otaya pangwa etaya aluka komauvu ngoka yena.

LEAVE A REPLY

Please enter your comment!
Please enter your name here