A dhipaga kuume ke kopaihole eti idhipaga

0
2208

Maria Namupala
OKONGO

Opolisi moshitopolwa sha Ohangwena oya lopota omukiintu gomimvo 28 a dhipagwa ku kuume ke kopaihole, sha ningwa oshiwike sha ziko komukunda Okambali momudhingoloko gwaKongo.
Omupopiliko gwopolisi moshitopolwa shoka Abner Kaume Itumba okwa koleke oshininingwanima shoka oshiwike shika, Itumba ta ti otaku fekelewa ookuume mbaka yali ye na oondjuma puundunda womanwino, na nakusa okwa matuka po a ye megumbo moka ha kala, ashike omufekelwa okwe mu landulile mo.

Okwa li a tondoka a ye pegumbo lyopuushiinda ando a ka holame ashike kuume ke ngoka okwe mu landulile ko, okwe mu adha a holama mondunda moka emwi ithana mo nokwa undulapo omweelo, nokumu yaha shoka she eta a hulithile owalala mpoka.
Omufekelwa okwa li a zimo anuwa ta tondoka uuka miihwa, nokwi iyaha nondjembo nokuhulitha owala mpoka. Itumba ta yelitha kutya kapuna uuyelele kutya oshike she eta ookuume mbaka ya longe iilonga mbyoka.
Nakusa ngoka gomukiintu okwa tongololwa kutya oye Maria Nekongo a yambukile komukunda Eexhwa. Kuuyelele mboka twa monopo kuza komumwayinagona gwa Maria owa ti omulumentu oha longele mohambo koombinga ndhoka nolundji ohaya kala nomukadhona gwe ngoka a dhipaga.

Otaku hokololwa kutya ondjembo ndjoka a longitha okweyi yaka mondunda yomuhona gwe, aapambele oya holola elimbililo lyawo taya popi kutya inaya uva nande esiku limwe ya nyenyeta. Nakusa Maria okwa thigiko aanona yatatu.
Moshiningwanima sha yooloka opolisi moshitopolwa shoka oyili mokashoko omulumentu inaa tseyika, ngoka taku fekelwa a dhipaga omukokele momukunda Omuzile. Iitumba okwa ti Omudhimba gwa nakusa Andapo Johannes ogwi itsuwa mondunda ye yokulala Osoondaha konima sho a ningi omasiku inaa monika ti inyenge po.

Itumba ta ti okwali iihulu kumonika etine sho a li puundunda womanwino pomudhingoloko ngoka, na gumwe gomaashiinda okwali a kwatwa komalimbililo Osoondaha, nokwa tokola aka tale ngele omo eli megumbo ashike okwa adhika a hulitha eli metente lyombinzi.
Otaku fekelwa a dhengwa noshiti oshikukutu shoka sha dhikulwa megumbo lye, noya mono mwaza ongaku yomulumentu, molwaashoka oha kala megumbo oye awike otaku fekelwa kutya ohashi vulika a li eya a yake po iimaliwa yomukulupe mbyoka a kwata kopenzela.
Opolisi otayi pula kehe ngoka e na uuyelele tawu vulu okumangitha po omufekelwa nenge wa mono omuntu ta limbilike momidhingoloko wu kale wa dhengela Seargent Ismael Haikondja ko 0812992057, nenge wu mone noku lopota kopolisi yili popepi.

LEAVE A REPLY

Please enter your comment!
Please enter your name here