Efimbo leefya la ya vali

0
249

Twa fika vali pefimbo olo hatu popi mokanya kutya efimbo lefudepo, efimbo letyapulo loshivilo shaKrismesa, efimbo lomalihafifo, mwa kwatelwa eehango kamana.

Ashike nande ongaho osha ninga omukalo ndjikilile, notwa fa twe shi tambula ko, kutya nonande hatu kala twa tokola notu na etumwaumbwile kutya Deseba efimbo lomatyapulo, luhapu omatyapulo aa ihaa xulu ina pa kuwa onghuo.
Woo oiponga yopomafimbo omatango manene moNamibia! Ashike nonande ongaha fye ihatu shi kotokele nee eshi. Ohatu mono ashike vati ofye tu na eendunge ile pamwe otuna omatuwa ondilo noku na onhapo edule makwao. Nomolwaasho ngee ovanhu voludi olo tava shingi mopate iha va dilaadila ovashingi vakwao, iha ve li ufa keemhango domeendjila, vo ovo naanaa luhapu veli ovaeti voiponga moshilongo.
Modula yo2014, ongongahangano youhaku mounyuni (WHO) oya li ya tula Namibia komutwe womusholondodo woilongo omo hamu fi unene ovanhu moiponga yomeendjila, okuyelakanifa noilongo ikwao mounyuni.

Eshi tashi kumwifa oshosho kutya oituwa oyo hai landwa muAfrica okuli ashike eepelesenda mbali doituwa oyo hai landwa mounyuni.
Otashi ende nee ngahelipi Namibia oo ena omuvalu wovanhu va nini-nini, ena ashike eemilliona 2,8 sha hala kutya nomatuwa aa eli meepate daye oo manini, ndele oye kamana moiponga mounyuni?

Kouyelele wa yandjwa kuMichael Sivak na Brandon Schoettle vokoUnivesity yaMichigan, omuNamibia okuna eepresenda 53 doku fya moshiponga shoshihauto, shi dulife oku fya kokaankera.

Oiponga ei oya talika ko onga ina enwefemo linene menghundipalo louhaku moipangelo yaaveshe unene tuu moilongo ina i putuka naayo opo tai putuka.
Ashike moNamibia omo oshilongo sha tali ka ko shina eepate diwa otaku hokololwa oiponga hai etifwa unene komalihumbato mai eendalaiva.

Ouyelele uli kepandja loMVA Fund yaNamibia ota u ulike ovanhu veli 713 va fya nave li 6795 ova ehamekwa moiponga yoituwa moNamibia modula yo2016 oyo aike. Omuvalu munene woiponga oyo oya holoka eshi oituwa ya alangata. Otaku hokololwa oiponga oyo ovashingi vanyengwa oku pangela oyeendifo yali ili 1210. Hano tashi luhapu hai etifwa kokushingilila ndele osheendifo tashi fiye po opate, nokwaalangata. Oiponga 1113, oya holoka eshi oyeendifo yeli puma mumwe, omo oiponga ili 1614 ya ningilwa moKhomas, ili 478 omErongo, 393 okOtjozondjupa na ili 362 omOshana.

Hano oitukulwa oyo ine oyo ya shiya ko moiponga yomeendjila moshilongo.
Ngaashi naanaa sha popiwa metetekelo oshietifi shinene shoiponga yomeendjila moNamibia omalihumabato ovashingi voituwa.
Na moNamibia shinene sha shiya ko, okunwa omalodu sha pitilila.
OvaNamibia otava nu nai. Momusholondondo woilongo oyo hai nu omaludu mahapu muAfrica, Namibia oku li pondondo onhinano. Ta nu eelitela dodungo dili 9, 62 momunhu mefiku, oku yelekanifa noshishiindalongo South Africa oo eli poutiheyali omo omunhu umwe hanu eelitela 9,46 mefiku. Eelitela odo oda kwatela mo ashike eebila nomalodu malula ashike eetombo nomapwaka naikwao oyo ya pika oshiwana ina i kwatelwa mo.

Omivalu edi ota di ulike kutya oshilongo shetu oshi li menyonauko, unene tuu ovanyasha. Nomolwaasho ovanhu vahapu ovo hava fi moiponga ovanyasha veli pokati komido 21 fiyo 45. Unene tuu vopokati keedula 31 fiyo 35.
Vo ovanhu ovo ovo naanaa tava longifa omalodu nai, ndee pefimbo eli lomatango manene, tava talele po eenhele domalihafifo, noivilo ngaashi yeehango, eshi tava di oko oveli koshi yodungo, oiponga kai vali kokule. Eshi shi udifa nai unene oshosho kutya, oiponga paife oya tali ka ko onga oshinima shopashito, ita i halula vali nomolwaasho omalihumbato ovashingi ta aanya okushendja.
Ngeno efimbo lomatango manene omudo ou, ngeno li kale la yooloka, ngeno efimbo lefudo lomudo 2017 ngeno otali kala shili lomatyapulo ngaashi vahapu va tengeneka, ndele ita li kala efimbo leefya. Natu lundululeni omali humbato etu, natu shingeni tuka fike ni neemwenyo nonomalutu eli moukolele.

LEAVE A REPLY

Please enter your comment!
Please enter your name here