LyaAngula a pakwa kengathithi pOlukonda

0
234

Maria Namupala

OLUKONDA – Ongundu onene yaakwashigwana, aasita naakwaELCIN oya gongala Olyomakaya ga piti pegongalo Olukonda okuthindikila ngoka a li nale omusita megongalo moka, noshowo omuevangeliste gwaELCIN omimvo odhindji.

Efraim LyaAngula okwa manene oondjenda dhe moshipangelo Onandjokwe mepipi lyomimvo 101. Okwa valelwa momudhingoloko gwOnyaanya ko oko a putukila. Okwa tseyika nawa koyendji unene sho a kala omuwiliki gopolohalama ya Kalunga kehekeleko alihe noshowo Ombiimbeli otayi ti ngiini, ndhoka a kala dhi ningi kOradio yOshiwambo mehangano lyOkutuma Omawi mOmbepo lyaNamibia NBC.
Okwa yapulilwa oshilonga shuusita mo 1942, nokwa wilika omagongalo ogendji. Aapopi ya yooloka oye mu tanga omolwa iilongapondoli mbyoka a longa moshigwana oshowo mongeleka ya ELCIN ayihe.

Omuwilikimbisofi gwaELCIN Omundohotola Shekutamba V.V Nambala okwe mu tangumuna ta popi kutya oye gumwe gwomaasita a kala ena eitaalo neinekelo lya kola. “Otwa gongala nena mpaka okuthindikila kuume ketu miilonga, kuku gwetu, tate gwetu nosho tuu, nonkene sho twa ngundumana mpaka otatu diladhila nokupandula Kalunga ngoka etu pele omushitwa gwe, okwa kondjo nokwa matuka olweendo lwe lwonkalamwenyo ndoka lwe ya pehulilo,” Omumbisofi Nambala ta ti ngaaka.

Ta ti okwa tseyika koyendji unene sho a kala omukwateli komeho goopolohalama ndhoka, a panga , ta aludha ta galikanene aavu, nokuya tenteka oshikaha she mOlukonda nokonyala moshilongo ashihe.

Nambala ta ti LyaAngula okwa yakula manga a li mepipi eshona lela, nokwa longa oshilonga shoka uule woomvula 72, okwa kala omukwathi gwaayehe nevangeli lyehupitho, omuhungimwenyo no ha kwatha aantu ayehe kee na ondjoolola.

Aasita yaza komagongala ga yooloka oyi ile ya thindikile kuume kawo miilonga taye mu tangumuna, noku hekeleka aathigwa po ayehe. Kakele koshilonga yakulo shuusita LyaAngula okwali woo omulongiskola, nopethimbo ndyoka okwali a tokola aye kootundi dhuusita hoka eki ilonga, nokuzala eguwo konima yepito lye.

Omumbisofi okwa yelitha kutya nakusa LyaAangula oye gwahugunina a kala momwenyo, nokwa hulitha mepipi lyoomvula odhindji kuyakwawo mboka ya yapulilwe pamwe, molwaashoka ayehe ya longa pamwe oyaka lala nale.
Omwana Sisco Shipena ngoka a popi peha lyoyana, okwa ti yo otaya pandula sho yali ya pewa omagano gaavali yawo, noya longwa oshili kuhe, ta ti yo oye wete kutya he ina sa ashike okwa ka vululukwa nonkene inaya pumbwa okulila yafa aakriste yaana eitaalo. Ta ti oya tekamo oshindji muyo ongele okulongela Kalunga, okusimaneka aakuluntu, okukala poohapu naatilikalunga naayihe mbyoka iiwanawa oyeyi longwa kaakuluntu yawo.

Omukulukadhi gwa nakusa meme Maria okwa manene oondjenda mo 2015, nokwa thigiko oyana yaheyali, ongundu yaatekulu naatekulululwa. Epako olya kalwa kaakwangeleki oshowo aambisofi yeli moshipundi shevululuko. Omwenyo gwe nagu vululukwe nombili.

LEAVE A REPLY

Please enter your comment!
Please enter your name here