Omaidhipago natango oga tsikila

0
513

Maria Namupala
ONDANGWA

Opolisi moshitopolwa shaShikoto oya indile aakwashigwana mboka ye na omaupyakadhi yaa wete nkene ta ye ga kandula po ya konge ekwatho lyehungomwenyo kaantu aa inekelwa mbala.
Eindilo ndika olya ningwa kOmukwatakanithi gopolisi moshitopolwa shokukondjitha omiyonena mopolisi yaShikoto, Naomi Katjiua ngoka a ti onawa ngele mboka ye na uudhigu oya tseyithile aapambele yawo uuna ye wete itaaya vulu we oku ga humbata, omanga inaa ya tokola okwi idhipaga.

Katjiua okwa endulula eindilo ndika sha landula eindjipalo momwaalu gwaantu tayi idhipaga moshitopolwa shoka.Omasiku gopetameko lyomwedhi nguka aantu yatatu oyi idhipaga momahala ga yooloka sho yi imangeleke.
Okwa ti eimangeleko nenge eidhipago nomukalo kehe oha shi kala omukundu omunene kaakwanezimo okwi itsa owala omudhimba gwomupambele gwawo, gwe endjelela, po pwaana oshinyolwa kutya okwi imangelekele shike. Okwa dhimbulutha oshigwana kutya eikuthomwenyo halyo ekandule po lyomukundu, “ashike oto vulu okutseyithila omuntu omwiinekelwa.”
“Ohashi gandja omaipulo omanene, uuna taku lopotwa omaikuthomwenyo pamukalo kehe. Nomwaalu gwaamboka yi idhipaga moshitopolwa muka ogwa londa unene” Katjiua a ti.

Mboka yi itsuwa yi idhipaga oshiwike shotango shomwedhi nguka oyo omulumentu gomimvo 19 iitsuwa mondunda ye yokulala momukunda Oshikulu moshitopolwa shoka.

Nakusa oye Simon Kali Nangombe, nokwali ha kala megumbo oye awike.

Ina thiga po omukanda gwaashoka she mwi ikuthitha omwenyo, nokwi imangeleke nongodhi.

Moshiningwanima oshikwawo shafa shoka, omudhimba gomulumentu gomimvo 29 ogwi itsuwa mondunda gwe endjelela komukunda Okatunduya. Nakusa okwa dhimbululwa oye Matheus Haufiku Joseph kOndangi moshitopolwa osho tuu shoka, ali omuniilonga megumbo moka iimangelekele. Na ye ina thiga po omukanda gwaashoka shemwi ikuthitha omwenyo, naapambele oya tseyithilwa.
Natango okwa lopotwa olutu lwomulumentu kee shiwike lwi itsuwa komalukalwa ga Shandumbala mo Katutura. Omudhimba ogwa adhika gwe endjelela mopaala kongodhi yolusheno, mepandaanda lya Claudius Kandovazu na Hans Dietrich Genscher.

LEAVE A REPLY

Please enter your comment!
Please enter your name here