Omainyanyudho goAwesome 2017 ga enda nawa

0
48

Pinehas Nakaziko

Omainyanyudho ngoka gali ga longekidhwa nawa okuhulitha omvula nenyanyu, goAwesome 2017, ga li ga ningilwa moWindhoek Olyomakaya yaziko, osho ga ende nawa.

Aahikingalo mboka yali yahiwa okuza meni nopondje yoshilongo opo ya nyanyudhe, oyali ye shi enditha nawa, mpoka oondigolo noomwilwa dha li tadhi uvikila kokule. Oshiindingili shika oshali shanana aantu ye vule 400.

Omuhikingalo ngoka a za moZimbabwe gwedhina Oliver ‘Tuku’ Mtukudzi oye a li a kwatela omainyanyudho ngaka komeho, noku imba oongalo ndhoka dhina omulyo gwoshikulu shonale. Tuku okwali a imbi oongalo dhe ngaashi Todii, Ndagarwa Nhaka, Neria naDzoka Uyamwe, ndhoka inaadhi thiga omuntu a kuutumba.

Oteya okwa li a gandja omainyanyudho ga kwata miiti, sho a li a imbi oongalo dhe oompe ngaashi Unconditional Love naPata Pata, pamwe naandanisi ye dhingi yaali mboka a kala nayo uule woomvula omulongo, noyali taya iteya shimwe to nyengwa.
Sally Keya ngoka a tseyika nawa Boss Madam, okwali naye a ulike uunongo we ngaashi eshiwikile nale, sho a imbi ongalo ye ndjoka yonale yedhina Boss Madam naRumbasa. Omulilo ogwa ka tema sho ongundu yaa imbi yatatu yedhina PDK, yali ya imbi oongalo ngaashi Moko naKempu. Aaimbi mbaka oya kala nokundaanisa yo taya nukathana komutse, taya hokitha aatali.

Diop okwali a gandja mo momukonda gwe, sho ali a imbi oongalo dhe dhoOviritje, mwakwatelwa ndjoka yiholike unene yedhina Bala Bala.
Ongundu yoNdilimani Ndilimani Cultural Troupe nayo okwali ya mwenyeke, sho yali ya imbi nokutseyitha omuhikingalo ngoka gwedhina Jackson Wahengo, noku imba ongalo yedhina Onyama.

LEAVE A REPLY

Please enter your comment!
Please enter your name here