Elelo lyUukwambi lya geelwa kaakwashigwana molwothiithiya

0
142

Loide Jason

ONGWEDIVA-Aakalimo yomomukunda Ekango mUukwambi oya limbililwa sho Elelo lyawo Lyuukwambi li li ompinge nokugamena omudhingoloko ngoka guna othithiya ndjoka tayi vulu oku eta uuwanawa koshigwana.

Aakwashigwana mboka ya talele po ombelewa ya Kundana oshiwike shika oya hokolola kutya oya ninga onkambadhala oku tota po oka ngundu hoka taka ungaunga nokuhumitha komeho omukunda ihe aniwa elelo ndyoka ka li na etimbo lyoku yambidhidha.
Oya ti okangundu oko tuu hoka oka ninga onkambadhala okuya kehangano lyokuungaunga nuuthigwa wopashigwana opo ehala ndyoka li gamenwe ihe aniwa elelo olyo tuu ndyoka olya tinda okushaina.

Kakele kaashoka sha tothwa mo kaakwashigwana, mbaka oyali wo ya lundile elelo kutya aniwa ohali landitha evi kaanangeshefa tali mbyonyitha po uushitwe yo iimaliwa ihayi longo sha momukunda ngoka.
“Ngele tse aakwashigwana otatu kondjitha oku gamena uushitwe ihe elelo ndyoka olina ompinge nena otatu humitha komeho omukunda gwetu ngiini.

Tse otwali twa pewa uuyamba ku Kalunga tuna omukunda guna Othithiya ndjoka tayi vulu okukala ya etitha oshimaliwa momukunda ihe ngashingeyi otayi mbonyonwa po komaloli ngoka taga landa evi oku katunga komahala ga ili nogi ili,” osho aakwashigwana mboka ya popi na Kundana ya hokolola , nonando ina ya hala omadhina gawo ga tumbulwe oshoka oya tila okutidhwa momukunda.

Mbaka oya ti sho ya yi komutumba gwelelo opo ya popye nalyo shi na sha nelanditho lyevi ndyoka inaa li ziminwa kaakwashigwana, oyali ya lombwelwa kutya aniwa iimaliwa mbyoka ohayi longithwa omahooli gohauto yelelo ndjoka ya za kepangelo.

Aniwa elelo olyali woo lya popi kutya aakwashigwana mboka aayelele ngele oya huluko ohaya fumvikwa woo niimaliwa mbyoka oshoka ohaya kala kaayena shoka taya longekidha nasho.

Ashike aakwashigwana oyati kutya uuyelele mboka ye na po omahauto ngoka gomalelo gopamuthigululwakalo ohaga kala nale gena omukalo gwokutulwa omahooli. Omanga woo aayelele haya ningilwa omalongekidho kepangelo oku pitila mombelwa yomupevi president koshikondo shomihoko dhoka inadhi putuka.

Aakwashigwana oyo tuu mboka oya ti kutya elelo ndika otali longo nuulingilingi ngele tashiya pakulanditha omahala ngoka ge na uushitwe tawu vulu oku humitha oshigwana komesho.

Sho Kundana a kwatathana nelenga enene lyUukwambi Herman Ndilimani Iipumbu , okwa ti ndhoka odha nakalindi oshoka nomukunda ngoka gwedhina lya tumbulwa ke gu shi.

Elenga enene lyuukwambi olya ikanyuna woo kutya oli li ompinge ngaashi tashi popiwa koonzo dhoka ta ti na ishewe iha longitha iimaliwa yevi okulanda omahooli ngaashi naanaa sha tothwa mo kwaamboka ya gandja uuyelele.

Ashike Kundana okwa ningi woo onkambadhala opo a dhengele omupopiliko gwelelo Reinold Iita ngoka a ti iha gandja eyamukulo moshigwana omanga ina kundathana nelelo alihe ngaashi naanaa shi li pamulandu gwawo.

LEAVE A REPLY

Please enter your comment!
Please enter your name here