Esba a kwathele ishewe gumwe eli moluhepo

0
151

Maria Namupala

OKAHANYA-Ehangano egandji lyomakwatho tali ithanwa Esba Pendukeni Foundation, olya tsikila okulundulula nokuguma oonkalamwenyo dhaamboka ya pumbwa omakwatho osho wo aayambidhidhwa.

Ekwashilipaleko ndika olya gandjwa komutotipo gwalyo Esser Banda Shilimela sho a yelitha kutya ehangano ndika olya ninga omimvo odhindji miilongaa mbika, yokukwatha nokuyambidhidha.

Oshiwike sha piti olya li lya gandja otyeke yooN$20 100.00 komulongwa Loide Nelago ngoka a valwa keehena omagulu. Nelago okuna omimvo 13, nokwa kala ha hiti enongelo lye posikola pOkahanya momudhingoloko gwOnyaanya moshitoplwa sha Oshikoto.
Pethimbo ndika okuli mondondo ontiheyali nomumvo gwa yi okwali a piti gotango mondondo yawo. Shilimela okwa ti oya li ya mono okanona haka mokati komumvo gwa ziko, sho kali ka tumbulwa komalungula.

“Konima sho twa mono onkalo yako otwa li twa ningi oonkambadhala nothika kuko, eta tu tala kutya otatu ka kwatha ngiini ka vule okutsikila nelongo lyako, shika otweshi ningi mekwatelo komeho lyombelewa yezulonkalo mOniipa. Otwa li twa faalele omagano giipumbiwa yomegumbo mwa kwatelwa iikulya na yilwe, notwe ka pe okatemba,” Shilimela ta ti.

Molwashoka ondjila yokosikola oyina evugu osha li oshidhigu okuya nokatemba, onkene omukuluntu gwa Esba okwa thaneke kutya omunona nguka a monenwe enongelo lin omuhandjo . Oosikola odhindji dhina omihandjo inadhi mu taamba.
Okwa monenwa osikola yi na omuhandjo moshitopolwa sha Hangwena hayi ithanwa MennoniteBrethren Community tayi adhika momudhingoloko gOmafo.

Nelago okuna ondjodhi yoku ilonga uundohotola wuunamiti opo a kwathe mboka taya pumbwa ekwatho lyopaunamiti.
Yina Ruusa Nembungu okwa ti 0nonande onkalo oya adhika tayi nyengana okufala omwana kosikola, okwa adhika a tokola kutya ota longo ngaashi tashi vulika okukwashilipaleka kutya okanona ke hoka oka mona elongo lyako, sigo ta ke li manitha.

Okwa ti pethimbo lyoondima ohe mu fala tango kosikola opo eye nawa aye mepya ye ta palapalapo a tegelele osikola yi zimbuke eke mu taleko ishewe. Nembungu pethimbo ta taambako otyeke ndjoka okwa ulike olupandu lwe unenene kehangano ndika.
Okwa ulike onkumwe onene molashoka kali a tegelela okupewa omakwatho ngoka ga kwatelamo ofuto yosikola, omizalo dhosikola, iipumbiwa yoskola ngaashi omambo na yilwe, ayihe oya futwa omumvo aguhe gwa pwako kehangano ndyoka. Nembungu okwa pandula Kalunga omolwa ekwatho ndika.

Ontana ndjika nande tayi monika yaana omagulu, nokoshikaha shokolumoho okuna owala ominwe ndatu, ihi ikwata shampa wa adha a tumwa ote eende ti ikoko a ka tale shoka a tumwa komukuluntu.

LEAVE A REPLY

Please enter your comment!
Please enter your name here