Okukala naaniilonga noku ya wilika

0
60

Ngame ondi shi shi kutya uuna ndi li naaniilonga yandje ongame omuwiliki gwawo, ihe ondi na wo euvoko kutya,ngame pamwe naaniilonga, iilonga mbyoka tatu longo oyo omuhona gwetu. Atuhe okutameka kungame sigo okaaniilonga yandje, uuwanawa otawu zi owala miilonga mbyoka tatu longo. Iilonga mbyoka tatu longo ngele onde yi longo ongame awike, nena itandi yi vulu, osho wo ngele aaniilonga yandje oye yi longo oyo ayeke, itaye yi vulu. Uuhona mbwiya wopambulu nowopaukoloni, womugandji gwiilonga ha kala owala a thikama i iya iikaha moondjepela/moondjato nenge i ikwata konima nenge poombwetule, nenge a kuutumba a shanga ofoo, manga aaniilonga ye taa longo, kawu shi uuwanawa nando. Paushili ngele owa adha kutya omuntu owu na uukolele wu li nawa, aaniilonga ngele otaya tumbu sha, nenge taya longo sha shilwe, nangoye tumba nenge longa owala kehe shoka taa longo. Uuna tamu undula oshihauto, ngoka ta hingi na kale a kuutumba moshihauto, ihe ngoka kee shi omuhingi, nando a kale oye mwene gwasho, na undule nayakwawo. Ethano lya tya ngaaka lyokulonga pamwe naaniilonga ohali kala ewanawa miilonga. Ngele owe shi iyigililike nena itashi ku uvitha nayi nandonando, nuuna nduno to zi po , oto topolele ashike aantu iilonga, e taya longo iilonga yawo. Oshinima sha tya ngawo , ohashi gandja oshiholelwa oshiwana.Uuna to pula nduno kutya: ‘Omolwashike hatu kala miilonga, ndele omuntu owa thikamena ashike yakweni taya longo? Otwe ya okwiilongela nenge otwe ya okulongelwa?” nena aaniilonga otaa ku uvu ko nuupu.

Ngame ondi hole nduno okuninga aaniilonga yandje omashendjo tandi ti;” Otu na elago sho otse atuke hatu longo. Andola otwa li hatu longeni, omukulukadhi gwandje, meme , tate nenge suwala yandje opo a kuutumba mpo, yo andola oye tu tala nduno tatu longo, andola ta zi po ta ka sa omitima.Sikulimwe andola meme/tate ota zi po ta ti:”Ohela ngaa nda vala omumwandje paushilishili, omuntu he ya megumbo ta ti oha kala kiilonga, nani oha longelwa owala kaalumentu aakwawo, nani ye iha longo. Otashi vulika ngele owa adhele kutya oondjokana dhetu kadha li oshinima sha simana, ando yamwe ando otatu zi po tatu ka tukwa kaakulukadhi yetu taa ti: ‘Aae-e, nani ngame inandi hokanwa komulumentu, onda hokanwa kenima lyowala. Omuntu ha longelwa ashike”

Aaniilonga yandje ohandi ya pula tandi ya ningi omashendjo tandi ti; “Ngele oto zi kegumbo lyoye mwene, oto ya wi ilongele nenge oto ya wu longelwe? Otse twa mana iilonga, ihe inatu maneni iilonga atuheni. Iilonga oya manwa owala kwaamboka ya li taa longo, ndele mboka mwa li mu tuli konima, inamu kutha ombinga miilonga, otse owala twa kutha ombinga mokumana iilonga.” Aaniilonga nduno mboka to longo nayo otaye shi mono kutya oshoshili. Shampa wa adha taya longo nayakwawo omuniilonga gumwe oha vulu okutya: Aae-e, otamu tu li iilonga man. Tse otwe ya tu longeni atuheni.’ Oku na ishewe natango oshinima shimwe hashi ningwa kaaniilonga, uuna omuhona gwawo piilonga keehe po, i ituma po.Omuhona oha ningi ashike sho tuu ta nyantuka po , dho oombuku adhihe otadhi ningi aahona, niilonga itayi longwa we, ongondengonde owala yi li po. Omuhona ngono sho tuu ta galuka, mokwaahe shi sha kwe sho te ya oteya pandula ta ti: ‘Iyaloo, omwa longa oshilumentu!”.Paushili nani aantu mba ya longa yaali ayeke, mbeya ayehe yane otaya pandulilwa owala medhina lyaambeyaka yaali.

Olwindji ohandi popi nduno tandi ti: ‘Yakwetu , inatu ningeni we ngaaka, iilonga ngele otwe yi peweni atuheni, kehe gumwe kutha ko oshipambu shi shi thike pungoye. Osho wo oshithima ngele oshe ya pokati, inapu ninga gumwe ota li ko oonkanko mbali , omanga gumwe ta li ko oonkanko omulongo, ihe konima otatu ki inoma kutya otwa lya, ndele paushili otwa hakanenwa po owala kuyakwetu.

Oshinima shimwe ishewe oshikwawo natango handi mono sha puka osho shika kutya, ngele omuhona ke po piilonga, omuntu gumwe otashi vulika a kale owala a kuutumba nuuna tu uvu oshihauto shomuhona gwe tashi dhuma, opo ta nukile piilonga, e ta kala mpoka a fa a li ta longo shili. Oshiholelwa shimwe osho shika kutya, mofaalama ndishi omu na omahwa ogendji, iihauto ohayi uvikila kokule, yo aantu taa tameke nduno okwiiningitha ya fa taa longo shili. Poompito dhimwe ngele otamu longo pokuma pwa yela, e to yi, aamentu ohaa lala ashike nethimbo lyomwiha inaali adha. Shampa wa galuka ningila owina , e to iyenditha momudhingoloko gwehala lyiilonga, ku kala ngaa inoo mona mpoka ya ninga oomvugo. Oshinima shika shokukonakona, otashi gandja elondodho kaaniilonga kutya, mwene gwiilonga okwa fa he ya tala nawa. Ondi wete kutya oshinima oshiwanawa okulonga pamwe naaniilonga ngele omuntu oto shi vulu. Piilonga ngele oto zi po wu na shoka to ka tala halambudhi, kakele ashike kutya kasha shi oshiwanawa wu kale owala wa kuutumba wa gondja momuzile nenge moshihauto, nenge wu li oondjululu, wa tala aaniilonga sho taya longo.

LEAVE A REPLY

Please enter your comment!
Please enter your name here