Omaudhano mOluteyi ge enda nawa

0
32

Shipi Elago

OLUTEYI-Esiku lyomaudhano nomayinyanyudho mOluteyi olya li lya nana aantu koombinga adhihe dhomukunda ngoka niitopolwa yopuushiinda oku tala omakondombolo sho ta ga li ehete metanga lyokoompadhi.

Ngaashi shito aadhani aakulu oya li ye na osipana yawo ndjoka ya tseyika nedhina Oluteyi Legends FC hayi zala okambindja ka yo kolwaala olumbulawu na oya li yi ikwata nOluteyi Young Stars muudhano mboka wa li wuna omadhingoloko ga hamano.

Oshikando shika oosipana ndhika mbali odha li dha ndiika oonyala mevi noku dhana shithike pamwe omadhingoloko gatano, ashike molweetho olutihamano no lwa hugunina omagulu gaakokele oga li ta ga monika ga vulwa nuumatyona owa li we ya monene ombululu na oya li ya tula mo ookoola mbali monola naashika oshe etitha opo Oluteyi Young Stars yi sindane po ethigathano ndika.
Omupopiliko guudhano mbuka Toivo Kamati okwa yakele ko Kundana kutya uudhano mbuka owo oshitopolwa sho ku eta aanamukunda pamwe mboka ha ya longo koombinga odhindji dhoshilongo.

“Desemba ogo omwedhi moka aantu ayehe haya galukile kiihwa hoka ya yambukile onkene otu uvite kutya olyo wo ethimbo lyo ku gongaleka aantu okupitila momaudhano yo ya tsakanene wo nookuume mboka ye etha nale,”Kamati a ti.
Okwa okangundu longekidhi oha ka kala ka longekidha omwiha gwoyina moka aanamukunda mboka ya holoka pomaudhano ngaka ha ya pewa iikulya.

Aagundjuka ohaya longitha wo esiku ndyoka opo ya kundathane iinima ya pamba ehumokomeho lyomukunda gwawo ongo oshitopolwa sho ku kwathela oonkambadhala dhepangelo oku eta eputuko kiitopolwa yokuushayi.

Okwa ti nuumvo oya tokola ya gongele oshimaliwa opo ya tameke oku opaleka oopate ndhoka dha taakana momukunda gwawo Oluteyi noku dhi tula wo omandhindhiliko ngoka ta ga vulu oku pukulula aalongithi yoondjila aape.
Okwa ti nuumvo otaya ka kambadhala oku etamo uudhano wa yooloka opo ya kwatelemo wo mboka iha ya vulu okudhana okatanganga kokoompadhi.

Oluteyi olu li moshitopolwa shaGongo ookilometa omulongo muuzilo wodoolopa yaKahao naashika oshikando oshitimulongo ta ku tyapulwa esiku lyomaudhano konima sho lya li lya totwa momumvo 2008.

Kamati okwa ti oye na ehalo opo esiku ndika li koke lyo lyi kale hali nana omangungo goosipana okuza koombinga noombinga dha Namibia.
“Okangundu longekidhi ota ka longo nuudhiginini opo nuumvo tu kale tu na esiku enene li vule agehe ga pita po.

LEAVE A REPLY

Please enter your comment!
Please enter your name here