Ombila yomukondjelimanguluko ya longelwa omuyonena

0
878

Maria Namupala

ELOMBE-Amushanga omukuluntu mUuministeli wOonakulwa Aakulu okwa indile aaleli yopamuthigululwakalo, yopambepo naapolisi ya longe muukumwe, nokuninga iigongi taya kumagidha oshigwana shaa longe omiyonena

Ambasada Hopelong Iipinge eindilo ndika okwe li ningi sho a li metalelo po pElombe mOshikoto omasiku ga zi ko okutala omuyonena gwa ningilwa ombila yomukondjelimanguluko momayendo gopegongalo ndyoka.

Oshiningwanima shika oshimwe shomiiningwanima tayi uvika koombinga noombinga dhoshilongo moka aalongi yomiyonena taya yonagula nokushundula oombila. Ombila yomukondjelimanguluko Julius Kambo Eino oya li ya shundulwa sho emanya lya ndjikulwako sho oshisiikilo tashi tatulwa po.

Oshiningwanima shika osha ningilwa momayendo gopElombe moshikandjohogololo Onayena.
Onkundana ndjika sho uvika kuuministeli wOonakulwa Aakulu, amushanga omukuluntu moshikondo shoka pamwe naanambelewa ya kalela po uuministeli mboka moshitopolwa shaShikoto oyali ya talele po omayendo ngoka pElombe nokutala iihuna mbyoka ya longwa.
Omumwayina gwanakusa Eino, Maria Shigwedha okwa hokolola kutya mumwayina okwa hulithile mo 2015, mo omo woo a tungilwa emanya molwaashoka okwa li omukondjelimanguluko.

“MuSepetemba otwali twa tseyithilwa kaa kwashigwana kutya emanya lyomukwetu olya longelwa omuyonena, naasho twa kutha esiku tu yeko otwa adha emanya ndyoka lya kuthwako, shoka shuulike kutya oyali ya hala okuli tumba po ashike ngiika olye ya nyenge molwuudhigu walyo,” Shigwedha a ti.

Ta gwedha po kutya oya nyengwa okushi hokolola, no ka ye shi kutya omuyoni nguka okuna na omalalakano geni. Ta ti nonande ya adhika taya hala okudhimbwa nakusa gawo, oshinima shika oshe ya etele oluhodhi.

Okwa ti sho ye ya pombila yomukwawo inaya mona po oompadhi , ashike emanya olya yambulwako etali tulwa pooha dhombila. Oya tseyithile uuministeli mboka wOonakulwa aakulu mboka wa talele po ehala ndyoka mu Desemba omumvogu..
Iipinge nosheendo she oya li ya gongala pamwe naakwanezimo oshowo aaleli yopambepo noyopamuthigululwakalo, ya tale kutya omukundu ngoka otagu hulithwa po.

Okwa ti oshinima shoka otashi yemateke unene sho epangelo lya taalelwa keshongo nompumbwe yoshimaliwa, noku eta ohenda kutya moshigwana omuna aantu oyendji yaa hole ombili nelandulathano, sho gumwe ta kambadhala okutunga ye gumwe ota teya nokumbonyagula.
Okwa ti oshinima shika shembonyagulo lyoombila dhoonakusa osha konekwa woo moshilandopangelo, nokwa indile opo shi hulithwe po, molwaashoka otashi kateke eyokomeho moshilongo.

Okwa kumike omahangano ngoka ga inekelelwa okulonga oombila nokutula ko omamanya ga longithe iinima ya kola opo omamanya kaa ga hanagulwe po nuupu.

Omukuluntu gopolisi posasiona yopolisi pOnayena Natanael Haiyaka , okwa indile oshigwana shi gandje uuyelele mboka twu vulu okukwatitha aayoni yombila ndjoka.

Haiyaka okwa ti opolisi onkene tayi tsikile nomakonakono, sigo ya mono ngoka a longa omuyonena nguka.

LEAVE A REPLY

Please enter your comment!
Please enter your name here