Onanyege Footbal Club enyakwa lyuudhano mOnayena

0
63

Maria Namupala

ONAYENA-Onanyege Football Club oyo enyakwa lyuudhano wokomumvo moshikandjohogololo Onayena.
Uudhano mbuka hawu longekidhwa pehulilo lyomumvo kehe, owa li wa kuthwa ombinga koosipana dha za momudhingoloko gwoshikandjohogololo shaNayena.

Omukwatelikomeho melongekidho lyuudhano mbuka Batie Shifotoka okwa ti oya toto po ekopi lyuudhano mboka oshikando shotango mOnayena. Wo uudhano mbuka owa dhanenwa mokapale komaudhano koseko yaNehale.

Shifotoka okwa ti uudhano owa li unene we egamena ketanga lyokoompadhi. Uudhano owa dhanenwe oku za mo 22-24 Desemba. Oospana 16 odha kuthile ombinga muwo.

“Ospana yokOnanyege oyo ye ya yotango sho ya dhenge mo konyala oosipana adhihe dha kuthile ombinga,” Shifotoka ta ti.
Onanyege oya dhenge mo Okasikili United nookoola 2-0 medhingoloko lyahugunina, konima yuudhano wa kindja pokati koosipana ndhika mbali.

Ongundu onene yaaholi yomaudhano oyali ya gongala pokapale, nokunyanyukilwa pamwe uule womasiku agehe. Naashika osha ulike kutya shika osho omukalo omwaanawa okulongekidha omaudhano pethimbo mpoka aanamukunda ya gongala pamwe yo taya tsakanene muukumwe.

“Edhiladhilo ndika olya etwapo kAaNayena yoyene mboka ya tokola opo ya tsakanene naashika otaye shi ningi pamukalo gomaudhano, nelalakano lyokutunga omalutu, yo taya kundathana nkene ye na okuyambula po omaudhano miitopolwa nomomidhingoloko dhawo.
Shifotoka okwi itaala kutya oshiwanawa uuna aantu ye ya komafudho ya nyanyukilwe pamwe, yo taya hangana molwaashoka ohaya kala komahala giilonga ga yooloka, nopendji ihaya mono ompito okutsakanena mokati komumvo.

Okwa ti gamwe gomomalalakano gawo oya hala okugongela oshimaliwa shoka tashi kwathele aayambidhidhwa moshikandjohogololo Onayena, pehulilo lyuudhano oyali ya gongele ooN$ 20 000 ndhoka dha pungulwa omanga taya tala kutya ota dhi longithwa ngiini.
“Nonande ekopi ndika lya dhanwa oshikando shotango, otuna omukumo neinekelo kutya otali koko nawa, nuudhano otawu kala ko omumvo kehe, otuna wo edhiladhilo tu tale wo ombinga komaudhano ga yooloka,” a gwedha po.

Onanyege oya sindana ekopi, oshimaliwa shoo N$ 1 500 noombandi 18 dhoshingoli, omanga Okasikili ka mono oshimaliwa sho N$ 1000, noombandi 18 dhoshisiliveli, Enkolo FC olye ya puutitatu nolya pewa oombandi dhoshikushu nooN$600, omanga Amajita eetelele okano nokwa pewa ooN$ 400.

Aakadhona nayo wo oya li ya dhana etanga lyokoompadhi omolwomainyanyudho, noya nyanyukilwa pamwe.

LEAVE A REPLY

Please enter your comment!
Please enter your name here