Aadhani aakulu mOshakati ya toto osipana yawo

0
83

Shipi Elago

Ongwediva-Ongundu yaadhani aakulu mboka ya dhanena oosipana dho mOshakati oya toto po osipana yoonakulwa aakulu ndjoka ya tseyika nedhina Oshakati Palmeiras FC.

Konyala aadhani oyendji oomboka ya li ha ya dhanene osipana yOshakati City na yamwe oya za moosipana dhilwe mOshakati.
Gumwe gwo maa toti po yosipana ndjika Rafael Nuumbembe okwa ti osipana oya totwa po nelalakano oku eta aadhani aakulu pamwe, opo ya tsikile noku ikutha omanzane oshoka oyendji iha ya dhana we moliha.

Okwa ti aadhani aakulu natango oye na omongo na oya hala opo ya tsikile noku dhana etanga lyokoompadhi pamuthika gwomayinyanyudho nokukwatela po uukumwe mboka wa kala pokati kawo pethimbo ya li haya dhana moliha.

“Osipana otwe yi ithana Palmeiras FC twe yi lukila osipana yokoBrazil Palmeiras FC ndjoka ya li ya kanitha aadhani yawo moshiponga shondhila ndjoka ya gwile mombanda omanga ya li molweendo oku fala aadhani naanambelewa kuudhano wekopi enene lyoosipana moSouth America lya tseyika nawa Sudamericana. Palmeiras FC okwa li ta ka dhana nosipana yo Atletico Nacional ashike shika ina shi ka ningwa oshoka aadhani oyendji oya li ya sile moshiponga shondhila ndjika omanga yahamano ya li ya hupu moshiponga shika na oye li momwenyo sigo onena,” Rafael ta ti.

Okwa ti oya tokola ya longekidhe omagongelo goshimaliwa opo ya kwathele uunona mboka wu li moluhepo momudhingoloko gwa Shakati ongoshitopolwa shawo shopankalathano oku hwepopaleke onkalamwenyo yoothigwa naamboka itaa ya vulu okwi ikwatha yoyene.

Osipana ndjika oya dhanene ehuliloshiwike lya zi ko moka uudhano wawo wotango ya li ya dhana shi thike pamwe nOshikuku Masters 1-1 pOshikuku omanga mOsoondaha ya li ya dhenge African Motto 2-0 mOshakati.

Nuumbembe okwa ti ehuliloshiwike ndika otayi ka dhana nosipana yaakokele yokoTsandi mOshakati ashike ina pu yela natango ngele ota
ya ka dhanena mokapale kEmanguluko nenge omwaahoka kokUukwangula.

Okwa ti oye na wo elalakano opo ya ka tulemo oshitopolwa shokudheulila, aadhani aashona osoka, ashike shoka ota shi ka ningwa konima oshoka ngashingeyi oya hala manga okutota po oshiketha shoku kwathela uunona mboka wa hepa nongele ayihe oya ende nawa nena ota ya ka landulithako ihe oshiputudhilo sho ku dheulila uunona uushona etanga lyokoompadhi.

Rafael okwa ti Oshakati Palmeiras oyi na wo edhilaadhilo opo yi tunge po osipana yoNetball ndjoka ta yi ka dhanenwa wo kaadhani aakulu yoNetball mboka ya dhanene moomvula dha piti mOshakati.

LEAVE A REPLY

Please enter your comment!
Please enter your name here