Aanona posikola Uahekua Herunga ya kwata kuuvu waa shiwike

0
635

Loide Jason

OSHAKATI-Omolwoondjamba ndhoka dha kala tadhi piyageneke moshitopolwa shaMusati, aanona poUahekua Herunga Primary School oyi ithininika momuhandjo posikola ndjoka. Onkalo ndjika oya etitha nokuli opo oyendji yomuyo ya kwatwe komukithi kaa gu shiwike.
Omukuluntusikola poskola ndjoka okwa ti omuhandjo gwosikola ye ohagu gwana owala aanasikola 200, ashike ngashingeyi ogwa edhilila aanona 307. Aanona mboka ohaya lala yi ithininika kuumbete uushona yaali nenge ye vulithe po. Onkalo ndjika yokuithininika kuumbete oye eta sigo oompoka aanona ya ne ya gwe ko koombete.

“Omukunda gwetu aguhe ogwa dhingililwa koondjambo ndhoka nokuli dhi na uundjambona. Shika osha nika oshiponga kaanona yetu mboka haya zi komagumbo nokuyamwe yomaalongi,” osho Omukuluntusikola Wilbard Amunkete a fatulula.
Ta ti aalongi mboka yeli moshiponga, oye li ya hamano. Dho oondjamba ngashingeyi otadhi ende dhu uka kosikola, dhi li konyala owala oshinano shokilometa yimwe sigo mbali lwaampoka oku adha posikola.

Sho onkalo ya ende yu uka kuuwinayi, elelonongelo olya tokola opo aanona mboka haya zi komagumbo na yo ya ye komuhandjo hoka ku na yakwawo.

Omukuluntuskola Amunkete, ota ti mosikola ngashingeyi omwa tukuka omukithi kaa gu shiwike, nonkalo ndjoka oya dhigupalela osikola oshoka okakilinika hoka keli popepi, okeli konyala ookilometa 45 oku za penongelo lyawo.
Sho Kundana a talele po osikola ndjoka okwa adha aanona yeli, 12 yi ikalekelwa oshoka oya li taya ehama, omanga omukuluntusikola a li a ka tala omupangi gwomomukunda eye e ya pe ekwatho lyotango.

Omupangi nguka sho e ya okwa ti aanona otaya monika ya zinda iipala, yo oye na oshimela shoka ye itaa vulu okupanga. Omuyakuli nguka gwomomukunda okwa li a thiminikwa opo a hinge ookilometa 20 a ye kehala hoka kuna onetwork yongodhi opo a dhengele okakilinika ka tume aapangi mboka ya pyokoka.

Amunkete okwa ti ngele oondjamba ita dhi vulu okuhingwa dhi ye kokule nosikola, omuhandjo gwosikola nagu gwedhelwe opo aanona ya gwane mo oshoka onkalo mosikola moka kayi na uuyogoki.

“Uuiyogelo mboka tu na inawu gwana, naanona oya thiminikwa opo aluhe ya kale haya penduka po5h00 yongula. Ethimbo ndyoka ongula unene, naashika osha guma nayi aanona yoGrade 1 mboka nokuli haya kala owala taya kotha mootundi,” Amunkete ta ti.
Ta gwedha po kutya osikola oya pumbwa oombete 20 nomatalashe 46. Uundjugo opo tau tungwa, na owa tegelelwa opo wu pwe mbala.
Osikola ndjika oya taalelwa wo keshoshongo oshoka olusheno lwosola ndoka ya kala haya longitha olwa kulupa, ngashingeyi pomuhandjo nguka ohapu kala pwa luudha nopwaana uuyelele washa uusiku.

LEAVE A REPLY

Please enter your comment!
Please enter your name here