Eengendabala do ku eta po oikulya nandi yambididwe

0
39

Eshi onghalo yodula noyeputuko tai ende nokulunduluka pashito, oshilongo nasho osha pumbwa oku endela pamwe nomalunduluko aa pautekenika, hano paunafaalama wopashinanena, voo naavo tava kendabala moshimhungu eshi shounamapya wopashinanena ova pumbwa eyambidido.

Mongaha ovo unene hava pewa omayambidido opashimaliwa ovanafaalama vokomadu omalandifilo, shaashi ovo ohava ningi oimaliwa momalandifilo oilongomwa yavo voo va dule okufuta ombaanga. Vali voo omadu avo okuna ‘ongushu’, onghee otaa dulu oku a kufwa ngeengee ova nyengwa okufuta omikuli.

Ashike ngeenge owa tale, edu alishe nande ololo lokomadu aaveshe oli na ongushu, ile otali dulu oku ngushupalekwa opo li dule oku eta po shidulife pwaashi hali eta po paife, shamha ashike ovanafaalama tava nghonopekwa nokuyambididwa pashivo nopashimaliwa opo va endele pamwe nefimbo.

Dilaadila Namibia ngeno lihena omapya ile ovanafaalama vokomikunda. Dilaadila oshiwana ngeno sheli kolelela ashike mwaasho tashi di keefaalama dopaipindi ile moilongwa mo ngaashi omapungu noilya taa di koilongo ngaashi koSouth Africa, Zambia naIndia. Ngeno mbela omavalulo epangelo okupalula oshiwana ngeno mbela okufike peni?

Osha yela kutya oshilongo ita shi dulu okuxupa ngeenge kape na ovanafaalama vokomadu aaveshe. Shoo vali, ovanafaalama ovo vokomadu aaveshe otava dulu okulonga xwepo shidulife pwaasho hava ningi paife ngeenge otava pewa eyambidido la wana.

Okudja lwopeedula 2008 moshitukulwa shaMusati omwa kala ovanafaalama vomomukunda vali va tameka tava longo nawa, tava longo olwishi. Ava ovali tava longo payambidido tali di kepangelo laJapan, okupitila moUnam. Paku tala ngee oshinyangadalwa eshi shali tashi ende, ngeno paife opoloyeka oyo ngeno paife oya kula. Ngeno ovanafaalama ovo navo otava yambidida oKalimbeza moku adjaneka nokulandifa olwishi. Ashike osha yela ovanhu ava kave na eyambidido opo ngeno ounafaalama koitukulwa yaaveshe nao u xume, keshe umwe okuli ashike kuye mwene.

Epangelo otali pandulwa eshi hali kwafele ovanafaalama vokeenhele daaveshe moku va futile omambakumbaku okupulula omapya avo. Otali pandulwa yoo sho hali kwafele mokufutila ovanafaalama moilonga yohelela.

Nando eshi ohashi ningwa epangelo noshoyo oikondo yopaumwene oya pumbwa okuninga shihapu opo ovanafaalama ava va ye komesho ndele vaa hakale ashike dula nadula tava longo ashike nomukalo umwe auke okudja tuu omafimbo ootatekulu noomeekulu .Ovanafaalama ava ngeenge omapya avo a pululwa komambakumbaku , ohashi va kufa efimbo lile oku a kuna molwa ohave shi ningi nomukalo wonale wo ohau kwata efimbo lile. Oshikwawo ekuno eli oikunwa imwe ohayi wile ashike pedu nokulika po koudila noshoyo keemhuku ilo ipepwepo komhepo. Ovanaafalama keenhele doipindi ohava longifa oikunifo okukuna omapya avo onghene aa ohaa mene nawa neteyo olo hava mono oliwa no hali va pe shihapu. Kaimba osha pumbiwa opo ovanafaalama vomoitukulwa ya aveshe va shiive kutya okuna oilongifo ilo oupululo wishinane wokukuna oo ihaa longifa oimuna ilo omahooli ndele ohava undulwa ashike ta va fulu oulambo tava tula mo ombuto vo tava fulile ko. Oupululo ava ovanafaalama otaa dulu oku ve li landela moku longela kumwe.

LEAVE A REPLY

Please enter your comment!
Please enter your name here