KK Palace naAfrica Motto oya tegelela oliha yi tameke

0
43

Shipi Elago

Oshakati-Oliha yoFirst Division sigo onena ina yi galukila mondambo na ota yi popiwa ashike ya fa okatana komiilya.
KK Palace oyo yimwe yomoosipana ndhoka hadhi dhana moliha ndjika na oya ligamena nokupakaleka omakutsi yi uve kutya oliha ndjika ota yi tameke uunake.

Ashike nando kapena esiku lyo thaathaa kutya oliha ndjika ota yi ka tameka uunake KK Palace oti ilongekidha nale, sho ta longekidha aadhani ye ya adhike ye li monkalo nopomuthika omwaanawa.

Kundana okwa li a wayimine osipana KK Palace Osoondaha ya zi ko pomadhewo gayo pokapale kEmanguluko mOshakati moka ya li ta yi idheula neitulemo.

Moonkundathana na Father Elemu ngoka oye omudheuli gwayo, okwa ti omadhewo ngaka taya ningi oga kwatela mo okutala nkene aadhani aape mboka ye ya mosipana ndjika taya dhana. Oshikwawo oya hala okutala kutya opomahala geni aadhani mbaka aape taya vulu okudhanithwa.

“Otwa hala wo okutala ngele mbaka oye na tuu eitulemo noshowo oonkondo okudhanena osipana ndjika” Father Elemu a ti.
Okwa ti sigo oompaka ina ya mona nando etseyitho kutya oliha yoFirst Division ota yi tameke uunake kakele ashike komifofolombo ndhoka tadhi ti oliha ota yi tameke omwedhi tu uka.

Elemu okwa ti KK okwi ilongekidhila etameko lyoliha onkene aayambidhidhi ye naya kale ya tegelela ashike nomukumo.
“Elalakano lyetu nuumvo otwa hala oku sindana po oliha ndjika no ku ya koPremier League hoka twa ninga ethimbo ele inaa tu ya ko onkene osho oshilalakanenwa shetu kutya ne ota shipula shike,” Elemu ta ti.

Omvalele yaZambia ndjika oya dhanena osipana yopashigwana ya Zambia Chipolopolo, omanga moNamibia a li wo a dhanene osipana yOshakati City.

Osipana onkwawo yokoNooli yi li moliha ndjika ashike ina yi thanga mo nando etanga limwe oondjoka yoAfrica Motto yomOshakati. Ndjika oya li ya yelwa okuza koSecond Division ashike oya li ye ende omupya oshoka omvo ngoka ya li yi na okudhana oshikando sho tango moFirst Division iinima oya yonuka, sho ooliha adhihe dhali dha thikama molwompumbwe yomukwashilipaleki.
Ashike osipana ndjika na yo oyi li momayilongekidho ga kwata miiti okutula aadhani yawo pomuthika gokudhana guli nawa, opo ngele oliha oya tameke ya ka tale nkene ta ye shi enditha.

Oonkambadhala oku ninga ekwatathano nomunambelewa gwoNFA ngoka eli le po oFirst Division koNooli odha hulile mokwena kwa hula na ina tu mona nando oongoka ta vulu oku tu pa uuyelele wa gwana kutya oliha ndjika ota yi tameke uunake.

LEAVE A REPLY

Please enter your comment!
Please enter your name here