Namibia ota mono omuloka muwa….nge omhepo yoTropical Cyclone Ava oya loto

0
98

Helvy Shaanika

Ongwediva-Nonande neudo okwa tengenekwa ku kale ku na omuloka muwa, ovanongononi ove na elikwatopomutima molwa omhepo ya fa okafudaela oyo tai imbi oilemo opo i halakane yoo odula i loke nawa ngaashi sha teelelwa.

Omunawino moikwameva mOuministeli wOunamapya, Omeva nOmaluxwa Leonard Hango okwa hokolola kutya okwali kwa tengenekwa nokwa teelelwa ku kale omuloka muwa, okudja petameko laJanuali. Ashike omafiku aa mefuta laIndia omwa tukuka omhepo yoshikungulu shedina Tropical Cyclone Ava oyo, oyo ili komunghulofuta waMozambique, nokoumbuwanhu wopokati konhunu Madagascar.

Hango ta fatulula kutya pashito, oilemo oha i li tungu po okudilila mefuta, ashike ngeenge okwa kala ku na ocyclone, oilemo oha i ndubala ashike ponhele imwe, no ita i dulu okudja po. Oshikungulu eshi hashi dingonoka ponhele imwe, shi li molupe lokafudaela ohashi ongele oilemo nokui keelela opo iha andjakanene oshitukulwa shinene noku ya keenhele dimwe ngaashi sha teelelwa meshito.
“Eshi ohashi eta opo odula i loke ashike pokanhele opo pe na ocyclone. Otropical cyclone ohai yukifa oilemo moule mewangadjo, na luhapu oshikungulu eshi ohashi eta oudjuu kovanongononi mokutengeneka onghalo yomuloka. No ngee ku ocyclone etengeneko ha li dulu oku lunduluka meendelelo inaashi teelwa nefimbo limwe, ina shi dimbulukiwa,” Hango ta fatulula.

Ta weda po ta ti omolwa ocylone oyo, oilongo oyo ili meni lenenedu ngaashi Namibia, oumbuwanhu waAngola, noitukulwa imwe yaZambia otai ka kala ina oluteni.

Ashike nande ongaho, Hango okwa ti ope niwe etumwaumbwile liwa shaashi onghalo ei yoluteni oya teelelwa i xule po okudja petameko laFebruali nokwa teelelwa omuloka muwa fiyo omuMaalisa.

Luhapu ngeenge ocyclone tai i pexulilo, odula oha i loko neenghono. Omolwaashi tashi dulika Mozambique, noishiindalongo yaye imwe ngaashi Malawi, naZambia mu ka kale eyelu.

Hango okwa yelifa kutya onghalo ei yeyelu itai ka kala ashike moilongo oyo ya popiwa, ashike noilongo ikwao moumbuwanhu waAfrica otashi dulika ika yelululwe.

Okuya pexulili laAguste wodula ya djako, omutumba omuti21 woAnnual Southern Africa Regional Climate Outlook Forum (SARCOF-21) wali moGaborone shaBotswana oo hau tale nokutengeneka efaneko lodula, owali wa mona kutya momudo 2017/2018, oshitukulwa shaSADC oshi na omhito iwa okumona omuloka uli poupokati wopedu pomwedi Kotoba, Novemba na Deseba 2017. Ashike okwa li kwa teelelwa omuloka uli poupokati wopombada pokati okudja muJanuali fiyo oMaalisa 2018. Ashike omolwa omhepo odula ina i loka vali nawa muJanuali ngaashi shali sha tengenekwa nopaife oku niwe eteelelo liwa lomwedi Febuluali na Maalisa.

“Paife ngeenge hatu tale komalungula otu wete kutya oshikungulu otashi ende tashi oka, nomhepo oyo ota i ende ta i lotele, sha hala kutya omuloka otau ka kala muwa okudja petameko laFebuluali,” Hango ta ti.

Ngaashi naanaa shili omukalondjikilile, ngeenge omuloka owa kala u na poupokati wopombada, unene tuu moAngola lokoumbuwanhu, omulonga moshilongo omo ohau lundu pombada, nomeva ohaa kungulukile meemhomholonga daCuvelai okuyuka moyana yokonooli yaNamibia. Hano otashi dulika neudo Namibia naye a ka mone efundja ngee onghalo yomhepo oya twikile ngaashi sha teelelwa.

LEAVE A REPLY

Please enter your comment!
Please enter your name here