Nghidinwa ota fumvikwa ongula poNkurenkuru

0
142

Oshilyo nale shOshigongi shopashigwana nOminista miikondo ya yooloka mepangelo lyaNamibia nakusa Rosalia Annette Nghidinwa ota fumvikwa Olyomakaya poshilando shaandjawo Nkurenkuru.

Nakusa Nghidinwa okwa valwa mo 26 Kotoba 1952 na okwa mana oondjenda omasiku 14 Januali 2018 moshipangelo sha Katoolika moWindhoek.
Okwa valelwa moNkurenkuru, moshitopolwa shaKavango Uninginino pethimbo ndika. Okwa joina ongundu yoSWAPO mepipi lyomimvo 22 momumvo 1974. Okwa longa iilonga ya simana mokukondjela emanguluko lyoshilongo, sho a kwathele aakondjelimanguluko paunamiti noshowo okuya pa omayakulo galwe

Nakusa Nghidinwa omupangi keithano, okwa li omuwiliki gwiilonga yuundjolowele yongelki OnkwaEvangeli paLutheri moNamibia[ELCIN] oshinakugwanithwa shoka she mu pe ewiliko lyomandiki guundjolowele moshitopolwa shaKavango omanga oshilongo inaashi manguluka nokonima wo sho sha manguluka.

Okwa li wo mewiliko lyongelki yaELCIN ndjoka a li wo a kalele po poshigongi shaakwaLutheri mUuyini mo 1987.
Okwa ningi oshilyo shoParliamende omumvo 2000 moka wo a ulikwa Omupeviminista yaaNiilonga okuza omumvo ngoka sigo 2005. Momumvo 2005 sigo 2012 okwa ulikwa Ominista yIikwagumbo mOmatembukilomo opo momvula 2012 pehulilo okwa lundululilwa kUuministeli wOgenda nuuwanawa waanona sigo omomumvo 2015.
Nghidinwa okwa thiga ko oyana yahamano.

Nakusa Nghidinwa okwa ningilwa oshituthidhimbuluko pambelewa moWindhoek metitatu omanga oshitiyali otashi ningwa Etitano poNkurenkuru ye ta fumvikwa kepangelo Olyomakaya poshilando shoka shi li moshitopolwa shaKavango Uninginino.
Ngoloneya gwaKavango Uninginino , Sirkka Ausiku, okwa tanga Nghidinwa omuwiliki ngoka a kwatele komeho ehumithokomeho lyoshigwana.

“Konima yokuthiga po oparliamende, nakusa Rosalia Nghidinwa okwa longitha ethimbo lye okuhumitha komeho enkondopeko lyaakiintu , okwa li wo omunashipundi shehangano lyaanafaalama momudhingoloko gwaMpungu.” Osho Ngoloneya Ausiku a ti.
Nghidinwa okwa li lela iitula mo miinyangadhalwa yoomeme mboka ye a nkondopeke momikalo dha yooloka.

“Okwa kwathele wo oomeme opo ya vule okukuthombinga momauliko giipindi. Mbyoka oyo yimwe yomomaipyakidhilo a li nago omanga inaa thiga po uuyuni mbuka” Ausiku a ti. -Nampa/John Muyamba

LEAVE A REPLY

Please enter your comment!
Please enter your name here