Omashisha giilya ga fikwa po kuwalye

0
436

Loide Jason

ONGWEDIVA-Kansela gwoshikandjohogololo shaTamanzi Johannes Iyambo okwa limbililwa konkalo yaakwashigwana mboka taya ningilathana uuwinayi.

Shika kansela okwe shipopi sho aniwa gumwe gwomaakwashigwana a fike po omashisha giilya yamukwawo momukunda moka nelalakano lye kali shiwike.

Oshiningwanima shika oshali sha ningwa omasiku ga zi ko pethimbo lyuusiku omanga aantu ya kotha, pomukunda Etilyasa mOngandjera moshitopolwa shaMusati.

Iyambo okwa ti oya kala nokushilila ompadhi ndjoka ya adhika po mashisha ihe inashi pondola sha oshoka ompadhi oya ka dhima po sho ya yi mopate.

Okwa ti ompadhi ndjoka otayi fekelelwa ya li ya zalekwa oshisitolofe na oshidhigu opo aanamukunda ya dhimbulule kutya oya lye.
Okwa ti uupyakadhi mboka wa taalela egumbo ndika owo mboka wondjala molwashoka omashisha agehe ngoka ga fikwa po okwali gu udha iilya.

“Megumbo moka omuna aanona yahetatu naakuluntu yatatu kumwe oyeli mo omulongo 11, ngashingeyi otaya si ondjala,” osho kansela a ulike uutile we.

Kansela okwa lombwele Kundana mongodhi kutya ombelewa ye oyi ipyakidhila okukonga mpoka tapu landithwa iilya opo ya landele mbaka ya vule oku adha koshikogo.

“Aanona mbaka oyendji uunene no ita ya vulu okukala taya lala nondjala, onkene otu na okuninga po sha ngaashi tashi vulika,” kansela a ndjandjukununa .

Okwa indile moshigwana mboka taya landitha iilya yomahangu ya tseyithile ombelewa ye opo yi vule okuhupitha ofamilia ndjika meendelelo ngaashi tashi vulika oshoka eliko lyawo ndyoka ya longa nuudhininini osho wo nuudhigu olya yonwa po.
Kansela okwa hokolola kutya sho a thiki pegumbo mpoka okwa adha mbaka taya thitha mo uulya mboka wa hupu mo ihe mbyoka yapya oyo oyindji na oya pumbwa lela ekwatho noonkondo adhihe.

Ashike Iiyambo okwa londodha mboka ha ya longele yakwawo omiyonena kutya otaya ka katukilwa oonkatu.
Okwa kumike wo oshigwana opo ngoka e na ontseyo yomuntu nguka alonga omunyonena a lopotwe opo shika shi mone ehulilo meendelelo ngaashi tashi vulika.

LEAVE A REPLY

Please enter your comment!
Please enter your name here