Oshigongi shuudhano woBokisa mOhangwena oshiwike shika

0
29

Shipi Elago

ONGWEDIVA-Olutu talu lele uudhano woongonyo moshitopolwa shaHangwena olwa tegelelwa lu ka ninge oshigongi oshinene mEenhana shoka sha ithana omitse ominene dhombokisa dha za kiitopolwa ya yooloka moshitopolwa shoka.

Omunashipundi guudhano mbuka moshitopolwa shaHangwena Israel Hamutumbangela okwa ti iilyo ayihe yooKalaba moshitopolwa shaHangwena iikulu naambyoka iipe oya tegelelwa opo yi ka kuthe ombinga moshigongi shika sha simana.

Shika otashi ka tula po noku talulula omisindalandu dhombokisa moHangwena noku ninga po okaliindeli kombokisa moshitopolwa.
Okwa ti oshigongi otashi ka ningilwa moshinyanga shendiki lyaanyasha mEenhana na otashi ka tameka potundi ontimulongo yongula.
Ota indile iilyo yooKalaba opo yi etelele ekotampango IBA(International Boxing Association) omadhina giilyo yomalutu geekalaba dhawo nosho wo omadhilaadhilo nkene kuna oku humithwa komeho uudhano woongonyo moshitopolwa.

Israel okwa li wo a kuthileko Kundana nkene omumvo guudhano gwo 2017 gwa li gu na omashongo omanene, unene tuu ngoka ga guma oshimaliwa, oshoka ka ya li ya mona nando olyo tuu ekwashilipaleko limwe momukokomoko gwomvula ayihe, naashika osha li sha gumu uudhano mbuka nayi.

“Ashike nando otwa li tuna omukundu gwatya ngeyi gwe tu kundukidha otwe shi pondola opo tu unganeke omaudhano goongonyo kumwe ge li omulongo, naashika oshi shi oku pandulilwa elelelomutima lyOhangwena oshoka olundji iilyo oya li ya yi moondjato dhawo opo uudhano mbuka wu wape okuya komeho,” Isarael a ti.

Okwa ti aagundjuka yomOhangwena oye hole uudhano mbuka na oye na ohamu okuwu dhana, a ti Ohangwena osho shimwe shomiitopolwa ya putudha aabokisi oyendji mokati kaamboka mu na yamwe haya dhana pomuthika gwopaigwana.

Okwa ti yaali yomaaBokisi mboka ya li ya kalele po Namibia muudhano wo Common Wealth waadhani ye li kohi yomimvo 20 oya li ya zi mOhangwena na oya li ye etelele oombandi dhoshikushu.

Onkene ota indile ayehe mboka yena ohokwe nuudhano mbuka opo ye, ya wayimine Olyomakaya pEenhana Youth Center opo ya ka kundathane, noku tala nkene taku humithwa komeho uudhano mbuka.

Israel Hamutumbangela oku li omunashiupundi guudhano woBokisa moHangwena na oye omudheuli gwoshiputudhilo shokudhenga oongonyo mOhangwena shedhina Intelligence Boxing Academy na okuna onkatu yokudheula ndjoka a pewa kolutu halulele uudhano mbuka muuyuni ndoka lwa tseyika nawa International Boxing Association pafupi (IBA).

Israel oku uvite kutya Namibia okwa yambekwa noshitalenti shomaudhano goongonyo onkene omaudhano goludhi nduka oga pumbwa eyambidhidho oshoka otaga vulu okutula Namibia mokati kiigwana muuyuni ngele tashiya puudhano.

LEAVE A REPLY

Please enter your comment!
Please enter your name here