Shikudule a kumike aveshe va pungule oshimaliwa omwedi keshe

0
151

Tuulikki Abraham

Lüderitz-Joseph Shikudule omunangeshefa womoLüderitz, ota ti oshimaliwa ihashi dulu ashike okupungulwa komunhu ou ha kwata omayovi mahapu, ndele omunhu keshe he shi mono kutya nee oshinini ile shihapu, ota dulu okushipungula.
Shikudule meenghundafana naKundana, oshivike shaya, okwa yandja omayele e na sha nepungulo loshimaliwa omanga kuliwe pehovelo lodula.

Okwa tumbula kutya, osha wapala neenghono ngee omunhu to hovele oku ongela oshimaliwa, okuhovela tuu pehovelo lomudo. Opo eshi odula tai katya lwopokati penya, omunhu ouna oshimaliwa shoye we shi pungula mombaanga, naashi odula tai ke lidenga po, ouna oshimaliwa, osho wa kala noku ongela momukokomoko wodula. Oto ka dula okulongifa oshimaliwa osho meemhumbwe odo we shi nhunina.
“Oshimaliwa shoovene osha mukwati, ashike ngeenge omunhu to pungula itashi ti ashike u pungule omayovi, oto dulu okupungula eshi wa mona.”

Oto pungula, wa tala ngaa kutya oto li fiile po oshimaliwa osho to longifa meemhumbwe doye, naashi to dulu okupungula, oho dulu nande okupungula eeN$50 ngee omoshivike ile okomwedi, ngaho oshimaliwa shoye owe shi tula ashike mepungulo.” Shikudule osho a yelifa.

Okwa itavela kutya epungulo loovene ola pumbiwa okuhovelwa petameko lodula, nomunhu owa pumbwa okupungula oshimaliwa omwedi keshe, she likolelela koyuuyemo oyo ho mono.

Shikudule okwa kumaida vamwe ovo hava pungula oshimaliwa, oule weehani donhumba, vo oimaliwa ota ve ke inhanako vali kombaanga, osho a fatulula kutya kashishi epungulo nando.

“Oto hange omunhu umwe okwa pungula oshimaliwa kombaanga, ndele konima ashike yomafiku manini, omunhu okwa yuka kombaanga ta ka nana oshimaliwa, kokaboba omunhu ha dulu okukanana oshimaliwa ongula ndele nomutenya nokomatango. Ngaho ino pungula.” Shikudule ta ti.

Ota tumbula kutya osha fimana omunhu ngee to pungula oshimaliwa u pungule ngaa una elalakano, kutya oto ke shi longifa, shonhumba, na opefimbo lili po to dulu oku ke shi nhanako nokushilongifa.
Shikudule ta ti, osha pumbiwa ko ka kalata ku kale ngaa kuna omuvalu wonhumba, she likolelela kwaasho ho mono , opo ngaa udule okutameka keeheke odo dili kevalulo lombaanga yoye.

“Okupungula kwoovene ita ku ti ashike ngeno u pungule efimbo wa mona oimaliwa ihapu. Efimbo wa mona oshimaliwa shihapu oto dulu okupungula shihapu, nefimbo wa mona shinini oto dulu okupungula shini osho wa mona. Ngaashi ava tuli meengeshefa, ino teelela keshe omwedi oto pungula N$800, oto dulu yoo okupungula eeN$50.” Shikudule osho a denga omufindo.

LEAVE A REPLY

Please enter your comment!
Please enter your name here