Aahikingalo oya hala iitaasi yoRadio yi hike oongalo dhaaNamibia

0
36

Shipi Elago

Ongwediva-Ongundu yaahikingalo aaNamibia oya geela ooradio dho moshilongo sho ihaadhi pe iihikomwa yaNamibia ethimbo lya gwana miitaasi yadho.

Mbaka oyu uvite kutya oshinima shika otashi dhipaga oshikondo shiihikomwa moshilongo.
Kundana okwa nkundathana naahikingalo ya tseyika nawa moshilongo Fishman Uulenga ngo a ti: “Tse ongaahikingalo moshilongo otu uvite kutya oongalo dhetu iha dhi pewa ethimbo lyagwana mooradio dhomoshilongo oku yelekanitha noongalo dha za kiilongo yilwe ndhoka hadhi pewa ethimbo olindji.”

Okwa ti oya hala iitaasi yomoshilongo opo yi tameke oku dhana oongalo dhomoshilongo oopelesenda 70 oshoka moshilongo omuna aahikingalo omathele nongele ooradio ita dhi dhana oongalo dhawo kapena siku aahikingalo mbaka ta ya ka tseyika koshigwana niihikomwa yawo ota yi ka sila moompa.

“Kakele kokutseyika koshigwana ooradio ohadhi futu iifendela koNASCAM olutu halu wilike nokugamena iihikomwa moshilongo naashika ohashi ningwa shi ikwatelela kutya ongalo oya hikwa lungapi, ko ku hika ongalo olundji oko ngaa koshimaliwa ta shi yi pombanda, pehulilo lyesiku NASCAM oha gandja iimaliwa mbika kaahikingalo shi ikwatelela kutya oongalo dhawo ohadhi longithwa ngiini, koku hikwa kongalo oko ngaa koshimaliwa shomuhikingalo ta shi yi pombanda,” Fishman ta tsikileko.

Oku uvite kutya molwaashoka oongalo dhaa kwiilongo ohadhi pewa ethimbo olindji nena oshimaliwa oshindji oha shi zi mo shu uka kiilongo okufuta aahikingalo aakwiilongo manga yaNamibia ta ya thigala po owala oshoka oongalo dhawo oha dhi liwa okapondamusita.
Okwa ti ota ya iyunganeke okupitila moNASCAM opo ya shangele iitaasi yooradio omukanda nyenyeto ngoka ta gu ka pula opo ooradio ndhika dhi dhane oopelesenda 70 dhiihikomwa yaNamibia esiku kehe opo ashike ta ku yandwa omamiliona ogendji ga kale ta ga thigipo oshilongo ga ka kutithe aahikingalo yokiilongo yilwe omanga yaNamibia ta ya si ondjala.

Omuhikingalo Sally Keya okwa ti “Namibia okwa pewa omagano gaahikingalo kaakuna we omolwashike ita tu longitha omagano ngoka twa pewa , ethimbo olya thika opo aaNamibia ya patulule omeho noku tala nkene oonzo dhoshilongo ta dhi zi mo esiku kehe okuka palutha aahikingalo yokiilongo manga aana yevi ndika ta ya si ondjala.”

Oku uvite kutya iitaasi yooradio oyo awike ta yi vulu okuthikitha oongalo dhaaNamibia koshigwana noku tsika ohokwe yo ku hola oongalo dhaNamibia mokati kasho.

“Eeno otu uvite kutya opuna ngaa iitaasi yimwe hayi kambadhala ashike oyindji ota yi nyengwa okudhana oongalo dhetu,omuntu oto ipula nee kutya olye mbela ta kadhana oongalo dhetu ngele ooradio dhetu ka dhi na ohokwe nuulaadhi wo kudhana oongalo dhoshigwana shawo,” a tsikileko

Okwa ti oha ya mono owala iiyemo okuza miihikomwa yawo lumwe momumvo okupitila moNASCAM ndjoka oyo ha yi gongele iimaliwa yokulongitha oongalo kooradio ashike oha ya mono omapeni gwowala oshoka omvula ya zako opwa li puna omuhikingalo gwumwe a li ashike a pewa N$ 210 momvula ayihe po opuna mbaa iha ya mono nando osha oshoka oongalo dhawo iha dhi longithwa nando koradio yimwe moshilongo.

John Max Omukuluntu gwaNASCAM okwa ti oyu uvite pamwe naahikingalo onkene otaya ka kambadhala mpoka ta ya vulu opo ya kwathele moshikumungu shika oshoka oyu uvite nkene aahikingalo ta ya mono iihuna molwoshimaliwa shoka oshishona hashi zi kooradio. Shika itashi vulu okuya humitha komeho omanga puna aahikingalo yokiilongo haya mono iimaliwa oyindji oshoka oongalo dhawo odho tadhi dhana onkandangala mooradio dhoshilongo shetu.

Okwa ti iilongo oyindji muuyuni ohayi imonikila momithigululwakalo dhoongalo dhawo, onkene ngele owu li mo, oshidhigu oku uva oongalo dhiilongo yilwe naashika ohashi nkondopaleke aahikingalo yomoshilongo.

LEAVE A REPLY

Please enter your comment!
Please enter your name here