Kashipu okufikamifa po ongeshefa –Muleka

0
98

Tuulikki Abraham

Lüderitz-Erastus Muleka ota ti kashipu okufikamifa po ongeshefa yokulonga noi pilangi, omo ta xupu paife novaneumbo laye.
Omunamido 46 Muleka okuna ongeshefa yokulongulula oinima oyo ya longwa moipilangi, ngaashi eembete da kulupa, ohedi longolola te di ningi dipe, eesikopa noipundi noitaafula, aishe oyo ohei longolola, nokuininga ipe idule okulongifwa natango.
Yeemwene ota hokolola kutya okwa kala omulongi womefuta, nokonima eshi oilonga yomefuta ya xula po, okwa hovela ongeshefa yokulonga noipilangi, konima yeedula 5 da ka pita.

“Kashali shipu nande nande, efimbo nda hovela nongeshefa, ei. Onda hovela ashike hailongo outaafula, handi saaga noshisaaga shokeenyala, ame handi dengele eembosha nohamala ei yokeenyala. Ovanhu ova kala nee tava yolo nge, ashike inai sholola, onda kala ashike nokuya komesho noilonga yange.

“Kansela woshikandjohoololwa sha !Nami#nus Jan Scholtz, oye nee aka vatela nge okasaaga kamwe kokolusheno, okudja opo, handi ende ngaa nee handi mono omashina, osho sha ninga ndi dule okulonga oilonga yange noupu, yoo oya wapala.” Muleka osho a hokolola.
Mulekala ota tumbula kutya oilonga yokulonga noipilangi, ina mona nande omadeulo asha, kakele kutya yee mwene okudja kounona waye okwadja ehole okudanauka ta pangele oipilangi.

Nonande ongeshefa yaye a tumbula kutya otai ende nawa, okwa holola yoo omashongo oo e na. Onhele omo ha longele oishona neenghono, ota ti oha pangelele pondje poo opena omhepo ihapu, oyo haidulu oku mweneka manga oilonga ya ye, nande oule wefiku limwe ile avali nokuli.

Ota ti onhele omo ha landifile nayo oinini, oha landifile ashike, monhele omo yee omo ha nangala, novanhu vahapu inava shiiva ongeshefa yaye shaashi oilongomwa oili ashike mokanhele kafinana, nongeenge onghalo yomhepo ili nawa kuhena omhepo tai fundula, ohadulu okupitifamo oilongomwa yaye, ikale pondje, opo ovaenda nadjila veimone.

Muleka okuna omafaneko ngeno a mone ngoo nande onhele ya andjuka, ina etala omo a kale ha tula oilongomwa oyo yapwa okulongwa, imonike kovalandi.

Kombinga yovalandi, ovo va shiiva ongeshefa ei ,konyala ovava ashike veli pomudingonoko, ashike oha longifa omukalo wokuyandja onhomola yongodi yaye, kovanhu ovo ha lande kuvo oinima oyo ya teka, yee te va pe ongodi yaye, ikale ishiivike kutya ohawapaleke oinima oyo yateka noku ininga ipe.

Muleka otatumbula kutya, efimbo a kala mongeshefa ei , nonande omwedi Januali eedula odo da ya ha kala ngaa afa amwena, ovalandi ihava kala po naana, ndele nee neudo ote li memesha, ta ti Januali ou, okwa mona lela ovalandi va yambidida ongeshefa yaye. Okwa ti, okwelineekela odula ei, ongeshefa yaye otai ka enda lela nawa momukokomoko womudo.

Etumwalaka olo ena kwaaveshe ovo vehena oilonga, ota ti, ovanhu na va kendabale naasho ve shii, naasho tava dulu, opo ve li monene omboloto. “Omunhu nande nekuyole, ove pula ashike komesho, ino sholola. Etameko alushe kalipu, olina omashongo mahapu. Okutya ngoo oilongomwa oyo to hovele okulonga tete nayo ihai kala naana ya wapala, ashike osho inashi ku teya okumumo, longa noudiinini, fiyo aishe tai uya melandulafano.” Muleka osho a kumike oshiwana.

LEAVE A REPLY

Please enter your comment!
Please enter your name here