A lathwa uupuka koshigwana sho a teya yina okugulu

0
1968

Loide Jason

Ongwediva-Omulumentu gwomimvo 38 okwa taambelwa moshipangelo shepanengelo mOutapi, ta pangwa sho a dhengwa kongundu yaantu yopomukunda gwawo sha landula sho anuwa a longitha ohauto ys thigululwa okumonitha yina oshiponga.
Omulumentu nguka okwa dhengwa kaanamukunda ooyakwawo anuwa sho a teya yina gwomivo 72 okugulu, e mu lyata owina noshihauto shoCorolla, omanga te shi shunitha monima.

Jason Sackaria omvalele yaNambelela moshikandjohogololo Anamulenge okwa hokololwa anuwa a ningi oshiningwanima shika oshikumithi komatango gOsoondaha ya zi ko.

Oshiningwanima shika osha ningilwa polukanda lwAnamulenge. Anuwa sho a longo iilonga mbika yuupagani, Sackaria anuwa okwa hingi oshihauto eteke shi kankameka pegumbo lyaandjawo, a thiga yina metente lyomonzi. Aakwashigwana mboka ya li po sho oshiningwanima shika tashi ningwa oyiikongolola noku mu landulila kegumbo hoka ye mu hangakene, nokumu dhengagula.

Omukulupe ngoka a teka okugulu kokolumoho, ngashingengeyi ota mono epango moshipangelo shepangelo mOshakati.
Omupopiliko gwopolisi moshitopolwa shaMusati Warrant Lineekela Shikongo okwa koleke onkundana ndjika a ti mbaka yaali ayehe ohaya zi megumbo limwe na ayehe ngashingeyi oyeli moshipangelo taya pangwa.

Shikongo okwa hokolola kutya uuyelele mboka wa gandjwa kopolisi nakudhengwa ngoka anuwa okwa li a hingi po ohauto yamumwayina ngoka a hula ko nale, eta yi na yo uule womasiku gaali, kee shiwike mpoka eli.Ohauto ndjoka oya li ya thigilwa yina kaakwanezimo.
Ashike yina sho a pula kutya omolwashike Sackaria a yi nohauto uule womasiku agehe ngoka, okwa li anuwa a geya oshoka yina anuwa haye a landa ohauto ndjoka.

“Okwa zi mo momutumba moka eta thikama a ka tale ohauto ndjoka opo anuwa emupume nayo. Shoka osho sha ningwa eta hingi po oshihauto she omanga yina eli metente lyombinzi,” osho Shikongo a hokolola .Nguka manga anuwa eli megumbo a lala mondunda ye aakwashigwana oyendji oye mu ponokele eta ye mu latha uupuka. Okonyala ye gu mane mo. Naashika osho she mu taambithitha moshipangelo moka eli moombete sigo ongashingeyi.

LEAVE A REPLY

Please enter your comment!
Please enter your name here