Meme Nghidinwa – Okudhimbulukwa nesimaneko omupiya omwiinekelwa gwa ELCIN

0
68

Paulus Homateni Nakawa

Meme Rosalia Annette Ndilinasho Nghidinua okwa li omunapolitika a simanekwa omuvali na yinakulu yaavalwa naateuklwa oyendji. Omuwiliki goshigwana omwiitulimo ethimbo kehe, nokombanda ya ayihe ye okwa li omukriste i iwetikile nomupiya gwa ELCIN omwiinekelwa.
Oyendji oye mu tseya “ongOmusimanekwa Nghidinua’ konima sho a ulikwa okuyakula epangelo ongominista yiikondo ya yooloka.
Ihe ngame onda hala okutanga nokudhimbulukwa Meme Nghidinua omupangi,matrona, omukuluntugongalo,oshilyo shewilikongelka lya ELCIN, omuwiliki goshigwana, ngoka okupitila mu ELCIN, a yakula oshigwana she omimvo odhindji moshitopolwa shaKavango Uuninginino ha lopota koombelewa oonene dhaELCIN kOniipa.

Pethimbo oshilongo inaa shi manguluka oongelki ya, ELCIN , yaAnglican noyaKatolika odha longo sha pitilila, ha moku uvitha ashike etumwalaka lyomwenyo gwa aluhe, ihe odha uvithile wo aathiminikwa elaka lyemanguluko neithikameno lyaantu yawo oku za kondjoko yuukoloni.[ELCIN/ELOK] pethimbo ndiyaka kohi yetonatelo lyehanganotumo lyaSuomi nenge Finnish Evangelical Lutheran Mission (FELM), okwa tungu iikunino, oosikola nomandiki guunamiti okugandja omayakulo ga pumbiwa kaantu yetu. Oongelki ndhika odha li dha pumbwa aantu ye shi kwi inekelwa na oye na ontseyo okuwilika noku kwatela komeho omahala ngaka. Meme Nghidinua, ngaashi a li a tseyika nawa pOniipa okwa ulikwa ongoMatona gwiilonga yUunamiti yetumo lyaLutheri moKavango e na oshinakugwanithwa shuupangelo, Nkurenkuru, Mpungu, Mupini, na Rupara. Pethimbo ndyoka nakusa Matrona Fiina Ndamono Shanghala okwa li mewiliko lyiipangelo mOwambo nale ye, Aletta Nghaikukwete okwa li omuwiliki gOnandjokwe Lutheran Medical Mission. Mbaka yatatu oya humbata olamba yuupangi pagano lya Florence Nightingale mokati komaudhigu, omapiyaganeko nomahepeko ogendji, noku uvaneka komeho gaKalunga nomontaneho yaantu ye , okulonga oshilonga shawo muuyogoki nomeinekelo.

Meme Nghidinua okwa li ewi lyaELCIN moshitopolwa Kavango nontompa ndjoka ya kwatakanitha Owambo noKavango nale kumwe , osho wo oku yi mangela kumwe noshihupe shoshilongo. Ontseyo ye okupopya omalaka ogendji gomoshilongo unene tuu Oshimbulu oge shi ningi oshipu kuye okupopya naantu oyendji.

Onda tseya Meme Rosalia Nghidinua okupitila moshifo shOmukwetu shoka shali ewi lya ELCIN pomathimbo omadhigu gekondjelo manguluko. Nakusa meme, ohe mu tumbula aluhe nedhina lyokoohe ta ti, “otwa simaneka meme Rosalia Shekupakela unene, omupangi gwetu omunawino ngoka a longwa mOnandjokwe; ondi mu shi nawa.”

Aatumwa yaSuomi mboka ya longa na nakusa Meme Nghidinua, ngaashi Maila Mustonen, ngoka e li moshipundi shevululuko koSuomi okwa tseya Meme Nghidinua mo 1962 no ya longo pamwe poMpungu noNkurenkuru na oye Omuthikameni gwa Maxwell omwanamti gwa Meme Nghidinua. Ote mu dhimbulukwa ngeyi: “Meme Rosalia okwa li omuntu omwaanawa okulonga naye oshoka okwa li e na owino yomuule yokuwilika aantu. Okwa li uuviteko omayooloko gomithigululwakalo dha yooloka oshoka okwa li e na ontseyo ombwaana meilongo lyonkalathano. Oha vulu okutala iinima nawa nomuule molwuuwanawa waantu ayehe. Okwa li a pyokoka mokulonga iilonga ye yuupangi e yi longo wo nuukeka noneitulemo enene. Okwa tungu po nokuyambula po omuthika guundjolowele moshitopolwa sha Kavango Uninginino, molwashoka okwa longo nohole, nuukeka nonomeho ga tala kokule. Kungame noshowo kaatumwa aaSuomi ooyakwetu pethimbo ndiyaka otwa li twa koneke kutya otaka ya kokule monkalamwenyo. Onkene oku ulikwa kwe ongomuwiliki miikondo yepangelo konima yemanguluko ina ku tu kumitha oshoka otu shishi muule womitima dhetu mwi, kutya Meme Rosalia okwa li iilongekidhila nale oshinakugwanithwa shika. “Otandi pandula Kalunga kandje sho a pele ndje omuniilonga omukwetu omunashiholelwa oshiwanawa na kuume kandje, onkene otandi dhimbulukwa onkalamwenyo ye nesimaneko.”

Pirkko Lattunen ngoka a longa na ye pOnandjokwe Lutheran Medical Mission na okuli mopenzela moFinland okwa ti: “Rosalia omuwiliki a valwa. Otandi dhimbulukwa sho twa longa na ye mOnandjokwe, kutya oha vulu okupopya naantu ayehe yomithika adhihe. Oshikwawo shoka ye, a li e na owino musho osho ewiliko lyiiniwe yoshipangelo. Otwa li twe mu inekelele iilonga yuuyaluli oshoka okwa li a longitha nawa iiniwe.Okwa li omwiinekelw na tse aatumwa aaSuomi otwa li twe mu inekela noku mu simaneka wo. Okwa li omwiifupipiki no ke na esiku a gandje le ombedhi komuntu molwoshilonga shongandi sha puka. Rosalia, kuume kandje , okwa li aluhe iilongekidha okumona epotokono lyomukundu. Kapwali nando ompito yimwe yaa he li nawa unene tuu sho a li nomagano gokupopya nakehe gumwe kutya ogoludhi luni. Ondu uvite esimano okukala nda tsakanena nokulonga naye.” Seija Hyvarinen okwa popi pahupi mokumudhimbulukwa, “Rosalia okwe tu taamba ko atuhe natse mbaka aakwiilongo, okwetu uvitha uugumbo. Iha dhimbwa kutya okwa za peni, onkene shampa twa talele po Namibia konima yemanguluko ohe tu hiya kegumbo lye okututelekela nonando okwa li nomaipyakidhilo ogendji. Otwe ku pandula meme Rosalia sho wa pitika wu kale oshilongitho shaKalunga, vululukwa mombili.”

Tatekulu Omubishopi moshipundi shevululuko, Josafat Shanghala, okwa longa naMeme Nghidinua mewiliko lyaELCIN . Okwa ti: “Meme Nghidinua okwa li kokagumbo pamwe naalongwa ooyakwawo ngaashi Olivera Neromba na Hertha Kalenga. Okwa dheulilwa uupangi mOnandjokwe nomOshakati pamwe naMs Johanna Kasheya-Haindongo. Meme Nghidinua okwa li omunegumbo lyetu oshoka okwa kala noku tu talela po sho twa li mOkahao, mOngwediva nOutapi. Okwa li nethimbo okukala pi ithanene yasimana yongelki. Miigongi yetu Meme Nghidinua okwa li gumwe gwaamboka ya lesha iiyetwa po ayihe noku yi uvako nawa. Okwa li omunamadhiladhilo nomupulakeni omwaanawa. Okwa li omagano kuELCIN. Okwa kwatakanitha Owambo noKavango nale kumwe nokwe yi ningi ezimo limwe enene. Ondjokonona yongelki yetu osho wo ndjoka yekondjelo manguluko itayi kala ya gwana po ngele edhina lye inali tumbulwa mo.Okwa li omagano kuELCIN nokwa yakula aantu yetu nongelki neitulemo, onkene otu na ongunga ye”

Omubishopi moshipundi shevululuko Kleopas Dumeni, okwa popi oshindji kombinga yanakusa Meme Nghidinua: “Rosalia okwa li gumwe gwomaakadhona yetu megumbho lyetu moTsandi, pethimbo a li mosikola yaakadhona. Rosalia omulongi kevalo. Okwa li e na omukumo netegelelo. Okwa li shili ihaa tila nokuna omukumo nomatokolo.ELOK/ELCIN okwe mu inekelele oshinakugwanithwa oshinene okuwilika iilonga tumo yuunamiti moshitopolwa shaKavango Uuninginino. Oye omuluudhe gotango a li a pewa oshinakugwanithwa shoka shoku wilika iilonga mbyoka molwashoka ewilikongelki pethimbo ndyoka olya li lye mu inekela kutya ota ka longa iilonga mbyoka neitulemo no neiyuvo lyoshinakugwanithwa osho wo eitulemo, shoka a ningi na ngame otandi vulu okushi hempulula noku shi kalela po. Aakiintu mbaka oya li shili omagano kongerki yetu newiliko lyayo,” Bishop Dumeni osho a popi neimemeho.

Ontakumandjimbo [ndjokonona ndjika] oya shangwa kombinga yoshilyo nale shoKabinete Rosalia Nghidinwa ngoka a fumvikwa nesimaneko lyopapangelo Olyomakaya ga piti momawendo gegongalo lyaELCIN moNkurenkuru popepi nomusamane gwe Sam Nghidinwa ngoka a manene oondjenda dhe omimvo (9) dha piti. Nghidinwa okwa si iiwike iyali ya piti moshipangelo moWindhoek mepipi lyomimvo 65.

LEAVE A REPLY

Please enter your comment!
Please enter your name here