Nakambale onkene ta yakula aatalelipo

0
100

Maria Namupala

OLUKONDA-Omukuluntuwiliki gwendiki lyiikulunima tali ithanwa Nakambale, Magdalena Kaanante-Iitula, okwa pandula sho omwaalu gwaatalelipo pendiki ndyoka tagu ende gu uka pombanda.
Endiki ndyoka lya lukilwa omutumwa omuSuomi Nakambale Kanene, nolya totwapo mo 1995 otali adhika momukunda Olukonda moshitopolwa shaShikoto. Iitula okwa ti ndika ohali yakula aatalelipo ya za kiilongo oyindji unene komanenevi Afrika, Amerika, Australia naEuropa.

Mendiki moka otamu adhika omathano giikulunima ngaashi iihongomwa yopamithigululwakalo dha yooloka, omathano gaatumwa aaSuomi, iilongitho ya yooloka, oshowo omambo ngoka ga shangwa unene oondjokonona dhaantu oohandimwe noondjokonona dhoongeleki naatumwa aaSuomi mboka ye eta elaka etoye kuumbangalantu waNamibia.

“Otatu kambadhala okukwashilipaleka kutya oondjokonona odha taambathanwa pokati kiilongo niilongo, oshowo dhi taambathanwe komapipi nomapipi dho tadhi topolelwathana molwaashoka opuna aantu oyendji yaashi naashoka aatumwa aaSuomi yetu etela”, Iitula ta ti.
Okwa ti omasiku gaziko oyali ya yakula aatalelipo ya za koAmerika yi ile 0nelalakano okutala nkene ehala lyiikulunima lyaNakambale tali monika, naashoka tashi adhika mo. Ta ti omahala ngaka ogeli po, okupashula, okulonga epipi lyokomongula noku ulika omathano giihongomwa ya yooloka.

Okwa ti elalakano ekwawo olyo okuhanganitha iigwana niigwana muuyuni yo taya taambathana omithigululwakalo dhawo,noku ulika shoka haya longo moshilongo.

Endiki ndika olye egulukila kehe gumwe ngoka a hala okuli talela po, yo ohaya gandja woo elongo lya nkene iilongitho mbyoka yi li mo hayi longithwa.

“Olundji uuna twa yakula aatalelipo ohatu ya fala komahala ga yooloka, ngaashi ya tale ongeleka ndjoka ya tungwa pethimbo lyaSuomi yi popepi nendiki lyetu, etemba lyiipilangi ndyoka lya kala hali longithwa kaatumwa okutalela po omahala nomahala, oshowo omayendo moka mwa fumvikwa aatumwa,” ta ti ngaaka.

Okwati aakwashigwana unene mboka haya nduluka iihongomwa noonyala dhawo oha ye eta kendiki ndyoka yi vule okulandithwa po nokuulikilwa aataleli po. Ohaya fala woo aatalelipo momikunda nokuyuulukila nkene iilonga ya yooloka hayi longwa momagumbo, unene ngaashi okutsa, okuteleka, okulonga, okuyungula, okutunga oontungwa, na kehe oshilonga hashi longwa komake.

“Omithigululwakalo etumba lyookuku yeli tu thigila tu vule okwi ilonga mo sha, tse tu vule woo tu longe aamwetu. Otandi pula aanaskola ya kale noku talela po omandiki ngoka taga adhika momidhingoloko dhawo” Iitula a tsikileko.

LEAVE A REPLY

Please enter your comment!
Please enter your name here