Ofuto yelongo miiputudhilo yopombanda otayi ehameke

0
51

Hofni Ipinge

Onga amushanga gwelongo mEwawa lyOngundu yAagundjuka yoSwapo (SPYL) ondu uvu nayi unene kiiputudhilo yimwe yelongo lyopombanda moshilongo, sho tayi thiminike aalongwa mboka tayi ishangitha ya taambwe opo ya fute oopelesenda 50 dhiimaliwa yosikola.
Oyunivesiti yaNamibia (Unam) kondandalunde, otayi pula oopelesenda ndhoka 50, kwa gwedhwa ooN$2000 dheyishangitho.

Aakongi yelongo otaya thiminikwa, nonando kwa konekiwa nawa kutya aavali taa tekula aanasikola mbaka itaya vulu okufuta oshimaliwa shoka. Oshimaliwa shokwiinyolitha shoN$2000 andola oshi li nawa, ashike okufuta oopelesenda 50 adhihe pethimbo limwe, otaku pula iimaliwa oyindji noonkondo. Nayi topolwe muuntimbu, aavali naya pewe ompito ya gwana, sigo ofuto yapu.

Oluhepo lwoshimaliwa muuyuni auhe otulu wete atuhe ni, nomolwashoka oshinima shofuto yelongo lyopombanda sha pumbwa shi talike ko nawa opo iiputudhilo yikale hayi pe aanasikola ethimbo lya gwanana opo wo aakuluntu ya mone ompito okulongekidha nawa aanona yawo ngele tashi ya kiifuta yosikola. Natu koneke wo kutya pethimbo lyetameko lyomumvo ohapu kala iinima oyindji, uunene okupulula omapya noshowo okutuma oluvalo olushona kiiputudhilo yopetameko ndyoka lili naana ethimbo edhigu ngele tashi ya koshimaliwa shoka wo natango sha li tashi longithwa piituthi yomatango omanene ngaashi naana tu shi sheni atuheni.

Oshigongi showina oshali sha tulwa miilonga kaangundjuka yoSwapo opo ya vule okumona Omupresident gwoshilongo, omupilima minista, oministeli yiimaliwa , amushanga gongundu yoSwapo, amushanga gwaagundjuka yoSwapo, omupresident gwehangano lyaailongi aaNamibia oshowo amushanga gwelongo mongundu yaa gundjuka yoSwapo.

Omutumba nguka ogwali gwa kwandjangele nogwa kutha po ashihe shoka tashi eta enkundipalo lyaanasikola opo ye ki ishangithe yo ya vule oku ya komeho nomailongo gomaithano gawo; omutumba nguka omunene ogwali gwatokola kutya: Aanasikola ayeshe naye ki ishangithe ashike nombili; Aanasikola naya fute owala oshimaliwa sheyishangitho shooN$2000 koUnam noN$4000 NUST. Na yimwe yi ili noyi ili; Oopelesenda 50 ongofuto yosikola osha li sha talika ko onga tashi ya hugunina ngele aavali yaanona aailongi ya mona oshimaliwa shoka.

Ashike nonando opwa li pwa ningwa omatokolo ngoka, Unam okuli sigo onena ta futitha aanasikola oopelesenda 50 shoka shili ompinge netokolo lyomupresidente.

Otatu indile Unam a simaneke eigidho lyomupresidente niilyo iikwawo yegumbo lyopashigwana okuzilila momauministeli gepangelo gi ili no gi ili mepangelo. Otatu ithana Unam oshiputudhilo shaNamibia shi shi li hashi kwathelwa wo kepangelo iiyemo yi thike poopelesenda 80 opo shi fute oondjambi dhaaniilonga yasho opo kaashi uvithe epangelo naanasikola nayi mokutuma aayilongi komagumbo opo yakatale iimaliwa kaavali nando itaya vulu okufuta. Otandi kunkilile iiputudhilo yopombanda opo yi pe aailongi yetu ompito yi ishangithe yo ya vule okulongwa nawa nokutula oshilongo shetu Namibia pomuthika gopombanda melongo nomo kutseya nawa onakuyiwa, opo tu vule wo okusimanekwa mokati kiigwana yo muuyuni iikwetu tatu yambidhidha okatendo okati-20 kekotampango lyetu lyoshilongo mokugandja elongo lyongushu kaailongi aaNamibia okuza petameko lela lyoskola.

Otandi indile opo Uuministelu welongo lyopombanda wi idhopemo moshikumungu shika mbala.
Otandi indile wo oshikondo shokufutila aailongi aaNamibia (NASFAF) opo shilonge iilonga yasho okupa aanaskola yetu iimaliwa yoongunga yoku ya ilongitha ngaashi naana sha kala. Otandi indile opo ya longe yiitula mo ya gandje oshimaliwa kaanaskola yetu opo yi ilonge no ya kale kaaye na omakemo mokufuta.

Tandi indile wo omahangano gopaumwene omaNamibia opo ga kwathele epangelo okugongela oshimaliwa shagwana okuyambidhidha nawa aailongi yetu aaNamibia. Elongo nali kondekwe opo tu mone wo eputuko lyopombanda miigwana yuuyuni.
Otandi indile wo NASFAF opo a kale wo nokufutila oshali aanaskola yetu mboka yali ya ningi nawa yevule yakwawo moshilongo ashihe opo ngaa yatsikile nokuyafutila oosikola dhawo dhopombanda oshali ngaashi naana sha kala hashi ningwa onga olupandu okuza kepangelo. Shika otashi tsu wo yakwawo mboka yakuutumba miipundi omukumo opo ya ilonge yamanamo okulalakanena okumona ompito yokufutilwa oshali kiiputudhilo yopombanda.

Te kumagidha wo aailongi aaNamibia opo ya longithe ompito kehe taya mono, ano yii ilonge ya mana mo opo ya vule okuyambula po Namibia. Ompito kehe taya pewa kaye yi ethe yi pite po ndele ye yi longithe nawa lela ongaanaskola taa lalakanene oonkalamwenyo dhawo oombwanawa. Elongo lyongushu yopombanda nali dhane onkandangala moNamibia lyetu.

LEAVE A REPLY

Please enter your comment!
Please enter your name here