Ohofa ya ti Ondangwa inayi kwata powe iimuna yaantu

0
141

Komutoolinkundana

Ovenduka-Elombwelo lyOmpangu yOpombanda kutya elelo lyOndangwa inali edhilila we iimuna mbyoka ya adhika moongamba dhondoolopa ndjoka, olya ulike nkene ekoko lyiilando yomuumbangalantu tali ipumu mumwe naakalimo momikunda kominkulo dhoondoolopa ndhoka. Oshinima shika oshina iilanduli iidhigu komawiliko goondoolopa ndhoka noshowo kaanamikunda mboka.

Etitano lyayi Ohofa yOpombanda oya lombwele ewiliko lyOndangwa kutya iimuna ayihe, mbyoka lyali, lye edhilila moshigunda shalyo, nayi piithwemo moompadhi oontalala, na ishewe ndika inali edhilila we , nando oshimuna shimwe moshigunda shoka okuza mpoka. Eindilo opo iimuna mbyoka yi egululwemo mbala olya ningwa kEhangano lyokukalekapo uuwanawa wiinamwenyo mOshana (SPCA), pomuthika gwe endelela lyati, iimuna mbyoka oya edhililwa yaana omeya nomwiidhi nenge iikulya onkene oshilanduli osho yimwe ya si, molwashoka inayi silwa nawa oshimwpiyu pethimbo ye edhililwa.

Etokolo ndyoka kalya li lya taambiwako nawa kelelo lyOndangwa ndyoka lya ti “ka mu na oshili” mwaashoka sha hokololelwa ompangu nokutya omalundilo ngoka kagena nando oompoka ga kwata nenge ga kankamekelwa.” Omupopiliko gwelelo lyOndangwa, Petrina Shitalangaho okwa ti elelo lyawo otali ka kondjitha etokolo ndyoka. Elelo lyOndangwa olina sigo omomasiku 14 gomwedhi nguka “okupopya kutya omolwashike elombwelo lyOmpangu kaa li na okuningwa lya aluhe’.”

SPCA okwa ulukile ohofa omathano giigunda mwaana iikulya noshowo omeya ga gwana, gamwe oga ulike wo iimuna ya sa. Oshipotha shoka inashi guma ashike Elelo lyOndangwa oshoka, SPCA okwa gandja wo elondodho kelelo lyOkahao hoka iimuna mbyoka yedhililwa yi li wo monkalo ombwiinayi. SPCA okwa li wo a thiminike elelo lyOshakati li egulule mo iimuna opo yi ka nape pondje yoshigunda shalyo.

Aanamukunda kombinga yawo otaya yolele ketayego no yu uvite nawa noku pandula elombwelo lyOhofa. Aakalimo yomomikunda dhili popepi noondoolopa ndhoka otaya ti omahumokomeho giilando mbika oga guma nayi oonkalamwenyo dhawo unene nodhedhi ninga ondilo okukala mooha noondoolopa ndhoka. Oshoka mbaka ngashingeyi oye na okukonga uulithilo wiimuna yawo komahala gokokule, mbaka oya thiminikwa wo okuka konga omahala omape gokunwetha iimuna yawo. “Aanambelewa yiilando inaya hala tu lithe iimuna yetu popepi noondolopa nenge tu
ka nwethe iimuna yetu pomithima mpoka twa kala hatu nwetha omimvo odhindji’ osho omuniimuna gumwe pOkatope a popi neyeme. Okatope ngashingeyi omukunda guli meni lyoongamba dhondoolopa ya Ngwediva.

Omalelo giilando yimwe ohaga kwatako iimuna mbyoka nando otayi lithwa komusita pomahala ngoka ga gwila meni lyoongamba dhiilando.
Eshongo lya taalela aaniimuna mbaka olyo ndyoka lyokufutila mo iimuna yawo moomango dhiilando, mbyoka ya tameka pooN$30 moshimuna oshishona sigo opombanda yooN$ 50 moshimuna oshinene.

Oshana SPCA oya ninga oshitopolwa shekondjo ndika , sho ehangano lya ti omalelo goondoolopa ota ga kaleke iimuna miigunda yaa he na omwiidhi noshowo omeya. Oshikwawo iimuna mbika ihayi konakonwa koondohotola dhiimuna yi monike kutya uundjolowele wa yo owuli ngiini.

Oshana SPCA, mewiliko lyomutseyiveta Wilmarie Horn, olya tokola oku patululila omawiliko goondoolopa ngoka taga hepeke iimuna iipotha yomiyonena mohofa. Lyo elombwelo lyOhofa yopombanda kelelo lyOndangwa otali kala elondodho komalelo goondoolopa dhilwe. Utya, Oshana SPCA oya tilitha elelo lyOkahao kutya otayi li ningile oshipotha shomuyonena ngele omunambelewa omukuluntupitithi ina katuka onkatu oku egulula mo iimuna moshigunda shoka.

Oshana SPCA oya thiminike wo elelo lyOshakati oku egulula mo iimuna opo yi ka nape . “Oshikondo shuukalinawa shOshakati osha ti iimuna nayi pitithwe yi ka nape yo tayi shunwa mo konima yokunapa,” Horn a ti.

“Oshana SPCA mekwathelo lyondohotola yiimuna oya kwatha onzinzi yimwe okuvala okatana molwashoka ndjika oya li ya nkundipala noku vala kuyo yene. Okatana oka valwa keli nawa noka kola. Oshana SPCA oya landa wo oshihampi sholusiana okupalutha ongombe ndjoka molwashoka ka ya li tayi vulu okuya yi ka nape yoyene pondje’ Horn a ti.

Ndele nee omalelo goondoolopa otaga ti , kayi shi iinakugwanithwa yago oku ondodha iimuna. Oya ti iimuna mbyoka hayi edhililwa oombyoka ooyene yayo yaa nako nasha okuyi tonatela, noshikwawo oya tsikile kutya iimuna mbyoka ohayi paluthwa ngaashi tashi vulika. Pethimbo ndika oshilando shaNdangwa osha ti itashi edhilile we iimuna moshigunda ndele otashi kala hashi yi hingi mo. “Shoka etokolo ndika lya ningi olya dhigupaleke ashike oshinakugwanithwa shetu na osha ningi ondilo molwashoka mbika ohayi tsikile noku galukila mo mondoolopa esiku kehe,” Shitalangaho a ti.

“Kamuna uushili mwaashoka tashi popiwa pethimbo ndika. Omalundilo ga ningilwa elelo ka ge na omakankameno nando olimwe onkene otwa tokola tu kondjithe etokolo ndyoka. Otu li wete itaali tsaathana kumwe no twe li tala ko ongo onkambadhala yoku luudhika nokundoyapaleka edhina lyewiliko, pehala shili lyonkambadhala okusila iinamwenyo oshimpwiyu.,” Shitalangaho a ti.

LEAVE A REPLY

Please enter your comment!
Please enter your name here